Ońtústik Qazaqstan oblysynyń ustazdary qazaq tiliniń latyn qarpine negizdelgen biryńǵai standartynyń jobasyna qatysty pikirlerin bildirdi.
Qazaq álipbiin latyn qarpine kóshirý - búgingi qoǵam talaby. Latyn qarpine kóshý máselesine qatysty Ońtústik ustazdary qoldaý bildirip otyr.
«Elbasynyń árbir reformasy el úshin de, óskeleń urpaq úshin de mańyzdy bolyp kelgen. Bul rettegi kóterip otyrǵan másele biz, ustazdar úshin óte úlken jaýapkershilik dep bilemin. Sebebi jańa qaripti tek pedagog mamandar ǵana emes, oqýshylar da jetik meńgerip alyp ketýi qajet. Sondyqtan alda jaýapty kezeń kútip tur. Oǵan bizdiń óńir tolyqtai daiyn dep aita alar edim», - deidi Shymkent qalalyq Bilim bóliminiń basshysy Janat Tájieva.
Al Túlkibas aýdany «Daryn» mektep-internatynyń direktory Farida Pirálievanyń pikirinshe mektepten bastap barlyq oqý oryndarynda oqytý úrdisi jeńildeidi.
«Aqordada usynylǵan jańa álipbidiń jobasyn búgin mektebimizdiń qabyrǵasynda ustazdar qaýymyna tanystyrdym. Áriptesterim jańadan usynylǵan álipbidiń yńǵailyǵy men aldyńǵy úlgimen salystyrǵanda jetildirilgenin aityp ótti. Onyń ishinde, qazaq tilin oqytqan ýaqytta basy artyq tańbalarǵa qatysty emle, erejelerdiń qysqaratyny qýantty. Ol mektepten bastap barlyq oqý oryndarynda oqytý úrdisin jeńildetedi. Ýaqyt ta, qarjy da únemdeledi. Úsh tilde bilim berip kele jatqan bizdiń mamandandyrylǵan daryndy balalarǵa arnalǵan mektep-internatynda búginde 200-den astam oqýshy bar. Jańa latyn qaripi bizdiń shákirtter úshin ózge tildi jetik meńgerýge jol ashady dep senemiz. Respýblikadaǵy úzdik 100 mektep qatarynan kóringen bilim uiasy úshin bul jaýapty kezeńde pedagogtar men oqýshylar esh qiyndyqsyz igerip keterine kámil senemin», - deidi ol.
Otyrar aýdany Sh.Qaldaiaqov atyndaǵy mektep-gimnaziiasynyń direktory Hadisha Qylyshbaevanyń oiynsha, latyn qarpindegi álipbidiń jańa jobasy kúndelikti qoldanysqa yńǵaily, mektep oqýshylarynyń kózine úirenshikti etip jasalǵan.
«Usynylǵan 32 áripten turatyn jańa joba ustazdar qaýymynyń kóńilinen shyǵyp, qoldaý tapty. Óitkeni kúndelikti qoldanysqa yńǵaily, mektep oqýshylarynyń kózine úirenshikti etip jasalǵan eken. Sonymen qatar, Elbasynyń jańa álipbidi bilim berý júiesine engizý úshin muǵalimder men ádistemelik bazany daiyndaý qajettigin eskergeni jáne Úkimetke ony kezeń-kezeńimen engizý jónindegi jospar ázirleý jónindegi tapsyrmasy ýaqytynda aityldy dep esepteimiz. Latyn álipbiine kóshý úshin bilikti oqytýshy kadrlar men ádistemelik baza qajet. Osy negizde, bizdiń bilikti ustazdar joǵaryda atalǵan jumysqa daiyndyǵyn jetkizip, qoldaý bildiredi», - dep atap ótti Hadisha Qylyshbaeva.
Esterińizge sala keteiik, keshe Aqordanyń tórinde ótken alqaly jiynda jańa qariptiń sońǵy úlgisin tanystyrmas buryn Elbasy bul - bizdiń qasterli Táýelsizdigimizdiń jemisi ekenin tilge tiek etti. Sondai-aq, osy rette biregei jobany iske asyrý aiasynda Prezident Ákimshiligine 300-den astam úndeý men usynys kelip túskenin, áleýmettik jelilerde 1000-ǵa jýyq taqyryptyq jazba jariialanǵanyn alǵa tartty. Elbasy 2025 jylǵa deiin latyn qarpindegi qazaq álipbiine tolyqtai kóshý jóninde tapsyrǵan bolatyn. Memleket basshysynyń nazaryna usynylǵan álipbi jobasynda 32 qarip tańbalanǵan. Jalpy, latyn qarpindegi álipbige kóshý qazaq tiliniń halyqaralyq dárejege shyǵýyna jol ashady. Qazaq tiline kompiýterlik jańa tehnologiialar arqyly halyqaralyq aqparat keńistigine kirigýge tiimdi qadamdar bastalmaq. Eń bastysy, túbi bir túrki dúniesi, negizinen, latyndy qoldanady. Bizderge olarmen rýhani, mádeni, ǵylymi, ekonomikalyq qarym-qatynasty, tyǵyz bailanysty kúsheitýimizge latyn tili altyn kópir bolmaq.
