QR Joǵarǵy Sotynyń ákimshilik ister jónindegi sot alqasynyń tóraǵasy Qanat Mýsin búgin qabyldanǵan Ákimshilik rásimdik-protsestik kodekstiń erekshelikterin túsindirdi, dep habarlaidy QazAqparat.
«Búgin – elimiz úshin tarihi kún. Sebebi, Ákimshilik rásimdik-protsestik kodeks búginnen bastap kúshine enedi. Osylaisha elimizde jańa sala – ákimshilik ádilet júiesi iske qosylady. Sizder elimizde azamattyq, qylmystyq, ákimshilik quqyq buzýshylyqtar boiynsha sot isin júrgizýdiń 3 túri bar ekenin jaqsy bilesizder. Jańa Kodekstiń qoldanysqa enýimen sot isin júrgizýdiń tórtinshi túri – ákimshilik sottar jumys istei bastaidy», - dedi Qanat Mýsin Ortalyq kommýnikatsiialar qyzmetinde ótken baspasóz máslihatynda.
Spiker álem elderinde sheneýnikterdi tártipke shaqyratyn arnaiy júie qurylǵanyn atap ótti.
«Muny ákimshilik ádilet dep ataimyz. Ákimshilik ádilettiń missiiasy – bilik organdarymen daý-damaida álsiz tarapty qorǵaý. Mysaly, bireý ákimdiktiń sheshimimen kelispeidi. Ol qaida barady? Árine, sotqa barady. Al, sot ol daýdy osy kúnge deiin Azamattyq protsestik kodekstiń tártibimen qarap keldi. Ol Kodekstiń ereksheligi – birinshiden, eki tarap tepe-teń. Sot protsesi jaryspaly túrde ótedi. Kimniń dáleli myqty, kim sotty barynsha sendiredi, sol daýdy jeńip shyǵady.
Ekinshiden, sol ákimniń sheshimi durys emestigin sot protsesinde aryz iesiniń ózi dáleldeýi tiis. Al, jai adam men kásipkerdi qolynda biligi bar organmen salystyrýǵa bola ma? Árine, bolmaidy. Memlekettik organnyń zańgerleri bar, múmkindigi kóp. Sondyqtan ondai daýlardyń kóbisi qalai aiaqtalatynyn bárimiz jaqsy bilemiz. Oǵan dálel – statistika. Daýlardyń 85% memlekettik organdardyń paidasyna sheshilip keldi. Árine, osylai bolǵan soń sottarǵa, jalpy bilikke jurttyń ókpesi qara qazandai», - deidi Q. Mýsin.
Al jańa Kodeks boiynsha daýlar múldem basqa printsiptermen qaralady.
«Munda taraptar teń emes. Sot aryz iesi retinde jeke azamatqa nemese kásipkerge barynsha kómektesedi. Sol ákimdiktiń sheshimi zańdy ma, zańsyz ba, ony endi talapker dáleldemeidi. Sol sheshimdi qabyldaǵan ákimdiktiń ózi onyń zańdylyǵyn, qajettiligin, negizdiligin dáleldeýi tiis», - dep túsindirdi Qanat Mýsin.
