Kópbalaly otbasylarǵa járdemaqyny resimdeý úshin qujattardy tapsyrý merzimi shektelmegen. Bul týraly QR Eńbek jáne halyqty áleýmettik qorǵaý ministrliginiń baspasóz qyzmetinen málim etti, dep habarlaidy "Ult aqparat".
Ministrliktiń aqparatyna sáikes, tórt jáne odan kóp balalary bar qazaqstandyqtar memlekettik járdemaqyny taǵaiyndaý úshin qujattardy qysqa merzimde tapsyrýǵa umtylyp, Halyqqa qyzmet kórsetý ortalyqtarynda dúrbeleń týǵyzýda. Al, bul sanattaǵy otbasylarǵa beriletin járdemaqyny rásimdeý merzimi shektelmegen.
«Qazirgi ýaqytta ár kópbalaly otbasy boiynsha is maketterin aldyn ala qalyptastyrý protsesi júrip jatyr. Bul, azamattarǵa yńǵaily. Iaǵni, olardyń 2020 jylǵy 1 qańtardan bastap jańa memlekettik járdemaqyny alý múmkindigi bolýy úshin aldyn ala jasalady. Qujattardy qysqa merzimde tapsyrý qajetttigi týraly messendjerlerde taratylyp jatqan aqparat shyndyqqa sáikes kelmeidi. Qujattardy qabyldaý úderisi eshqandai merzimdermen shektelmegen», - dep atap ótti vedomstvodan.
Atap ótilgendei, qazirgi ýaqytta arnaýly memlekettik járdemaqy alatyn kópbalaly otbasylar, iaǵni qarjylai kómek 2018 jylǵa deiin taǵaiyndalǵandar (otbasyna 10 500 teńge bolatyn) úshin jańa járdemaqyǵa kóshý HQO-ǵa júginbesten, januiada besinshi jáne odan da kóp balanyń dúniege kelýin eskere otyryp, avtomatty túrde júzege asyrylady. Sonymen qatar, QR Eńbek jáne halyqty áleýmettik qorǵaý ministrligi bul járdemaqy birinshi ret taǵaiyndalatyn kópbalaly otbasylarǵa taǵaiyndaýdyń belsendi formatyn qarastyrýda.
Eske salaiyq, búginde Parlamentte 2020 jylǵy 1 qańtardan bastap 4 jáne odan da kóp kámeletke tolmaǵan balalary bar nemese 23 jasqa deiingi kúndizgi oqý bóliminde oqityn stýdentteri bar otbasylarǵa memlekettik járdemaqy tóleýdi kózdeitin Zań jobasy qaralýda. Ol áýlettiń tabysyna qaramastan saralanǵan mólsherde taǵaiyndalady: 4 balaǵa – 42 496 teńge; 5 balaǵa – 53127 teńge; 6 balaǵa – 63 757 teńge; 7 jáne odan kóp balaǵa – 74 388 teńge.
