Foto: Sputnik/Kseniia Voronina: UGC
"Qazaqstan halqyna" qoǵamdyq qorynyń tóraǵasy Bolat Jámishev "qor bolǵanyna qaramastan, nege qazaqstandyqtar balalardy emdeýge áleýmettik jelide aqsha jinaýdy jalǵastyryp jatyr" degen suraqqa jaýap berdi, - dep habarlaidy Tengrinews.kz.
Qor málimetinshe, búginde qazaqstandyqtar "Qazaqstan halqyna" qoryna 155 milliard teńgeden asa qarjy aýdarǵan.
"Elimizde qymbat em alýǵa muqtaj balalar áli de kóp. Áleýmettik jelide balalardy emdetý úshin qarjy jinaityndar áli de azaimai tur. Qor áleýmettik jelide aqsha suramaý úshin qurylǵan joq pa? Jaǵdai nege ózgermei otyr", - dep surady tilshi qor brifinginde.
Suraqqa jaýap bergen Jámishev baǵdarlama aiasynda orfandyq (sirek kezdesetin aýrýmen aýyratyn) naýqastardy emdeýge jáne dári-dármek satyp alýǵa 30 milliard teńge qarastyrylǵanyn túsindirdi.
Onyń aitýynsha, búginde qor memleket satyp almaityn 33 dárini satyp alyp jatyr.
"Bizde dári-dármekke muqtaj adamdardyń tizimi bar. Byltyr jetkizýshilermen kelisimshart jasadyq. Byltyr qiyn boldy, óitkeni bul jetkizýshilerdi elshilik arqyly shetelden izdedik. Biyl balalardy dári-dármekpen qamtamasyz etý boiynsha josparly jumystardy atqaryp jatyrmyz.
Biz balalardy shetelge jiberemiz, qaterli isikke shaldyqqan balalardy shetelge jiberý kriteriilerin keńeittik. Elimizde ai saiyn birneshe bala shetelge emdelýge ketedi. Búginde 245 balaǵa dári-dármek satyp alamyz. Jyl aiaǵyna deiin bala sany artady. Byltyr barlyǵy 130 bala bolsa. Biyl 4 aidyń ózinde 115 adam. Odan da kóp bolady", - dedi Bolat Jámishev.
