«Jyr qaǵany – 2018» poetikalyq dýeliniń estafetasy Taraz qalasyna jetti. Qazaqstan Jazýshylar odaǵynyń bastamasymen Almaty qalasynda alǵash uiymdastyrylǵan poetikalyq dýel estafeta túrinde ózge oblystarda jalǵasyn taýyp keledi.
Alǵash bolyp Almatynyń jas aqyndary estafetany qaraǵandylyq aqyndarǵa tabystaǵan bolatyn. Qaraǵandy oblysynda jalǵasqan «Jyr qaǵany – 2018» poetikalyq dýeli joǵary deńgeide ótip, estafeta Jambyl oblysynyń jas aqyndaryna tapsyryldy.
Endi mine, kóne Tarazda «Jambyldyń jyr qaǵany – 2018» poetikalyq dýeli ótkeli jatyr. Qazaqstan Jazýshylar odaǵynyń bastamasymen ómirge kelgen jobanyń Taraz qalasynda ótýine Jambyl oblysy ákimdiginiń mádeniet, arhivter jáne qujattama basqarmasy, oblys ákimdiginiń jastar saiasaty máseleleri basqarmasy, oblystyq kásipodaqtar birlestigi qoldaý bildirýde.
Sondai-aq, Qazaqstannyń Eńbek Eri, «Kazfosfat» JShS direktory, oblystyq máslihattyń depýtaty Muqash Eskendirovtiń jeke demeýshiligimen Jambyldyń «Jyr qaǵanyna», arnaiy júldegerlerge qomaqty qarjylai syiaqy úlestiriledi.
Shara sońynda estafeta Shyǵys Qazaqstan oblysynyń jas aqyndaryna tabystalady. Jyl sońyna deiin oblys-oblystarda ótetin poetikalyq dýeldiń qorytyndy kezeńin Almaty qalasynda ótkizý josparlanýda.
Jyldyń aiaǵynda Qazaqstan Jazýshylar odaǵynyń Ádebietshiler úiinde oblystardaǵy «Jyr qaǵandarynyń» basyn qosyp, Qazaqstan jas aqyndarynyń ishinen «Eldiń jyr qaǵanyn» taǵaiyndaý úshin qorytyndy poetikalyq dýel ótedi.
«Eldiń jyr qaǵany» sailanǵan soń, kelesi poetikalyq dýel ótkenge deiin bir jyl boiyna «Eldiń jyr qaǵanyn» óńir-óńirlerge shaqyryp, jyr keshterin, kezdesýler ótkizý, kitabyn shyǵarý, telearna, radio, respýblikalyq basylymdar men saittarda suqbattar uiymdastyrý, jyrlaryn nasihattaý kózdelýde.
«Jambyldyń jyr qaǵany – 2018» poetikalyq dýeliniń joǵary deńgeide ótýine tilektespiz!
