Qazaqstanda jyr alyby Jambyl Jabaevtyń 175 jyldyq mereitoiyn resmi túrde merekeleý bastaldy, dep habarlaidy QazAqparat.
Q.Qýanyshbaev atyndaǵy Memlekettik akademiialyq qazaq mýzykalyq drama teatryndaǵy mereitoilyq jyldyń saltanatty ashylýyna mádeniet jáne ǵylym qairatkerleri, Almaty jáne Jambyl oblystarynyń delegatsiialary keldi.
Merekelik keshtiń qonaqtary jańa teatr foiesinde uiymdastyrylǵan Jambyl Jabaev mýzeiiniń ekspozitsiiasymen tanysty. QR mádeniet jáne sport ministri Aqtoty Raiymqulova saltanatty is-sharada baiandama jasady.
Biyl Táýelsizdiktiń 30 jyldyǵy aiasynda jyr alyby Jambyl Jabaevtyń 175 jyldyǵy atalyp ótýde. Memleket basshysy Q.K. Toqaevtyń Jarlyǵymen uly aqynnyń mereitoiyn joǵary dárejede uiymdastyryp mazmundyq deńgeiin qamtamasyz etý maqsatynda arnaiy memlekettik komissiia qurylǵan edi.
«Qadirli ziialy qaýym! Jambyl qazaq ádebieti men mádenietinde erekshe orny bar Alataýdai asqaq tulǵa. Jyl dúldúli, epik aqyn retinde qazaqtyń sýyryp salma improvizatorlyq ónerin biik shyńǵa shyǵardy. Tól ónerimiz aitystyń ereksheligi sóz tapqyrlyq emes, batyldyq, ótkirlik, shyndyqqa toly kórkem beineli sózder tabylyp, qalyń jurtqa qoǵamdyq máseleni aiqyn jetkize alýymen qundy. Jambyl aitysy árdaiym tereńdigimen, kórkemdigimen, tarihi negizderimen astarly mazmunymen jurtty baýrap alǵan edi», - dedi ministr óz baiandamasynda.
Jambyl qazaq ádebietindegi týǵan halqynyń maqtanyshy ǵana emes, álemdik deńgeidegi jyr alybyna ainaldy. Óleńderi dúnie júziniń qyryqtan astam elderiniń tilderine aýdaryldy. Aqyn shyǵarmashylyǵy týraly R. Tagor, M. Sholohov syndy qairatkerler joǵary baǵalaǵan.
«Jambyldyń biylǵy mereitoiynda aitýly aqynnyń ómiri men shyǵarmashylyǵyn jalpy ult maqtanyshy retinde ǵana qarastyrmai, jas urpaqtyń tarihi tanymyn keńeitip, otansúigishtikke táribeleýdiń yqpaldy quralyna ainaldyrý mejelenip otyr», - dedi A. Raiymqulova.
Aita keteiik, Qazaqstan Respýblikasynyń Memlekettik hatshysy, mereitoidyń memlekettik komissiiasynyń tóraǵasy Qyrymbek Kósherbaev elordadaǵy Jambyl eskertkishine gúl shoqtaryn qoiǵan edi.
Búgin elimizdegi jáne shet elderdegi qalalar men eldimekenderde Jambyl Jabaevtyń eskertkishteri men biýsterine gúl shoqtary qoiyldy, árqily mádeni sharalar ótkizildi.
