Búgin Taraz qalasynan «Kóne Taraz» tarihi mádeni ortalyǵy, Jambyl eskertkishi alańynan saltanatty túrde Astana qalasyna «Uly Jibek joly. Kóne Tarazdan asqaq Astanaǵa tartý» atty kerýeni jol tartty, dep habarlaidy "Ult aqparat".
EKSPO-2017 halyqaralyq mamandandarylǵan kórmesi aiasynda uiymdastyrylǵan kerýen quramynda-20 túie, 46 at bolady. Onyń 6-y at arba, 10 júk avtokóligi, 3 avtobýs, 6 qyzmettik avtokólik (uiymdastyrýshylar, MAI, jedel járdem, tótenshe jaǵdai t.b.)- 150 adam bar.
Kerýen Astanaǵa jetkenshe Jambyl jáne Qaraǵandy oblystaryndaǵy jol boiynda ornalasqan 10 eldi mekenge toqtaidy.
Árbir toqtaityn pýnktterde EKSPO-2017 kórmesin nasihattaýǵa baǵyttalǵan is-sharalar uiymdastyrylady. Kiiz úiler tigilip, qazaq eliniń turmys-tirshiligi, salt-dástúrleri sahnalanady, ulttyq sport oiyndary, kontserttik baǵdarlamalar ótkizilmek.
Bekitilgen kestege sáikes, aǵymdaǵy jyldyń 26-30 shildesi aralyǵynda EKSPO-2017 halyqaralyq mamandandyrylǵan kórmesi aiasynda Astana qalasynda Jambyl oblysynyń mádeniet kúnderi ótedi dep josparlanýda. Atalǵan kerýen kórmege eki myń jyldan astam tarihy bar kóne Tarazdan tamasha tartý bolmaq.
Sharaǵa bailanysty Basqarma tarapynan uiymdastyrylatyn is-sharalardyń jospary men baǵdarlamasynyń jobasy jasalyp, búgingi tańda jan-jaqty daiyndyq jumystary júrgizilýde.
Mádeniet jáne sport ministrligi janynan EKSPO-2017 kórmesine bailanysty qurylǵan Shtabtyń kestesine sáikes, 26 shilde kúni Jambyl oblysy EKSPO aýmaǵyndaǵy «Amfiteatrda» mádeni-kópshilik is-sharalar ótkizedi. Iaǵni, osy kúni oblys kúnderiniń ashylýyn ótkizý josparlanyp otyr. Onda túrli formattaǵy sharalarmen qatar kórmeler, teatrlardyrylǵan kórinis jáne oblys ónerpazdarynyń kontserttik baǵdarlamasy uiymdastyrylady.
Baǵdarlamaǵa sáikes 5 kún boiy josparlanǵan sharalar óz kezegimen óte beredi (kórmeler, teatr qoiylymdary, kontsertter). Oǵan aldyn-ala Astana qalasynyń ákimdigi usynǵan qala aýmaǵynda oryndar qarastyrylǵan.
Al, 28 shilde kúni «Qazanat» qalalyq ippodromynyń aýmaǵynda salynatyn «Etnoaýylda» is-sharalar uiymdastyrý Jambyl oblysyna júktelgen. Ol jerde kúni boiy sheberler aýyly, sheberlerdiń týyndylaryn satýǵa arnalǵan «Shyǵys bazary», kontsertter, teatrlandyrylǵan qoiylymdar, ulttyq sport oiyndary jáne t.b. is-sharalar uiymdastyrylady.
Sońǵy kúni, iaǵni 30 shildede «Han Shatyr» oiyn-saýyq ortalyǵy janyndaǵy alańda Jambyl oblysy kúnderiniń jabylýyna arnalǵan oblys ónerpazdary men Jambyl óńirinen shyqqan belgili estrada juldyzdarynyń qatysýymen gala kontsert uiymdastyrylady.
Sonymen qatar, halyqaralyq «EHRO-2017» kórmesine álemniń ár túkpirinen keletin qonaqtarǵa «Uly Jibek joly» boiyndaǵy saýda, mádeniet, órkeniettiń rýhani ortalyǵy bolǵan Ejelgi Tarazdyń tarihymen tanystyrý maqsatynda «Uly Jibek joly. Kóne Tarazdan asqaq Astanaǵa tartý» atty kerýen uiymdastyrylady.
