Jambyl oblysynda 60 jas mereitoiyn týystarynyń yqpalymen atap ótken aýdan ákimi qatań sógis túrindegi jaýapkershilikke tartyldy, dep habarlaidy "Ult aqparat".
Áleýmettik jelide beinejazbasy taraǵan Baizaq aýdanynyń ákimi Baqyt Qazanbasovtyń qatysýymen ótken otbasylyq merekelik shara boiynsha ákimnen túsinikteme alynǵan.
Jambyl oblysy ákiminiń mindet atqarýshynyń 3 tamyzdaǵy №173-J/Q ókimimen Qazanbasovqa qatań sógis túrindegi tártiptik jaza qoldanyldy.
Bul týraly oblys ákiminiń baspasóz qyzmeti habarlady.
«Sondai-aq, Jambyl oblystyq sanitarlyq-epidemiologiialyq baqylaý departamentiniń hatyna sáikes Baqyt Qazanbasovqa QR Ákimshilik quqyq buzýshylyq kodeksiniń 425 babymen 87510 (seksen jeti myń bes júz on) teńge kóleminde aiyppul salynyp, tólengen»,-delingen habarlamada.
Sondai-aq, B.Qazanbasovtyń óz túsiniktemesinde kórsetilgendei merekelik is-shara aýdan ákimine tosynsyi retinde týystary tarapynan jasalǵany jazylǵan.
Aýdan ákimi otbasylyq is-sharany sol jerge kelgende bilip, quttyqtaýlardy qabyldap, úiine qaitqan.
Túsiniktemede is-sharaǵa jaqyn týystardan 38 adam qatysty delingen.
