Almaty oblysynda QR Memlekettik hatshysy Qyrymbek Kósherbaevtyń qatysýymen jyr alyby Jambyl Jabaevtyń «Jambyl álemi» 30 tomdyq shyǵarmalar jinaǵynyń tusaýy kesildi, dep habarlaidy QazAqparat.
Aqyn mýzeiindegi bul sharada shyǵarmashyl jastarmen kezdesý uiymdastyrylyp, rýhaniiat taqyrybynda ózara pikir almasý ótti.
Jambyl Jabaevtyń 175 jyldyǵy men el Táýelsizdiginiń 30 jyldyǵy úilestirilgen jiynǵa QR Premer-Ministriniń orynbasary Eraly Toǵjanov, Almaty oblysynyń ákimi Qanat Bozymbaev, QR Mádeniet jáne sport ministri Aqtoty Raiymqulova, Qyrǵyz eliniń delegatsiiasyn bastap kelgen Qyrǵyzstan Memlekettik hatshysy Súiúmbek Kasmambetov qatysty.
Aldymen resmi qonaqtar Jambyl Jabaev pen Nurǵisa Tilendievtiń eskertkishterine gúl shoqtaryn qoiyp taǵzym etti. Munan soń aqyn mýzeiinde Almaty oblysy ákimdiginiń Qazaqstan Jazýshylar odaǵymen birlesip shyǵarǵan 30 tomdyq «Jambyl álemi» kitaptarynyń tusaýy kesildi.
Almaty oblysynyń ákimi Qanat Bozymbaev óńirde Jambyl Jabaevtyń mereitoiyna baǵyttalyp ótkizilgen sharalarǵa qysqasha toqtalyp ótti.
«Mine, ózderińizben birge Jambyl Jabaev ádebi-memorialdy mýzeiinde elimizdiń keleshegin kemel etetin respýblikamyzǵa belgili jas aqyn-jazýshylarmen kezdesip, Qazaqstan Jazýshylar odaǵy basqarmasymen birlesip shyǵarǵan «Jambyl álemi» 30 tomdyǵynyń tusaýkeser rásimin saltanatty túrde atqaryp otyrmyz. Bul ǵasyrdan ǵasyrǵa mura bolyp qalatyn ádebi altyn qor dep sanaimyn. Ulylarymyzdy ulyqtaityn igi isterimiz kóp bolsyn«- dedi Q.Bozymbaev.
«Jambyl álemi» 30 tomdyǵyn Almaty oblysynyń ákimdigi Jazýshylar odaǵymen birlesip shyǵardy. Oǵan oblystyq biýdjetten 114 mln teńge bólindi. Onda aqynnyń ómir tarihy, shet tilden aýdarylǵan shyǵarmalary, mýzykalyq murasy, Jambyl Jabaev týraly zertteýler, estelikter, aqynnyń ustazdary Súiinbai, Qaban jyraý, Mailyqoja, zamandastary, shákirtteri týraly derekter men shyǵarmalary, J.Jabaev týraly kórkem shyǵarmalar, Jambyldyń talantty urpaqtary jaily jáne basqa da derekter engizilgen.
