2020 jyldyń 11 aiynda Jambyl oblysynda 121 sybailas jemqorlyq qylmysy tirkeldi. Bul týraly QR Sybailas jemqorlyqqa qarsy is-qimyl agenttigi Jambyl oblystyq departamentiniń basshysy Ádilhan Áshirbaev aitty, dep habarlaidy "Ult aqparat".
«Elimizde qalyptasqan epidemiologiialyq jaǵdaiǵa qaramastan oblystaǵy sybailas jemqorlyqqa qarsy qyzmet Memleket basshysy men agenttik tóraǵasynyń tapsyrmasyna orai barlyq qajetti sharany qabyldap jatyr. Agenttiktiń jańa talaby - sybailas jemqorlyqqa qarsy qyzmettiń jumysyn sannan sapaǵa aýystyrý. Departament jumysyn osy baǵytta jalǵastyrýda. Aldyn alý is-sharalarymen qatar turaqty negizde jedel izdestirý jáne tergeý qyzmetin júrgizip jatyrmyz. Nátijesin qysqasha aitar bolsam, osy jyldyń 11 aiynda departament 121 qylmystyq isti tirkedi. Bul byltyr tirkelgen qylmystyq ister sanynan birshama az bolǵanymen aýyr sanattaǵy qylmys sany kóbeiip otyr. Biyl 84, al ótken jyly 72 aýyr qylmys tirkelgen edi», - dedi ol.
Onyń aitýynsha, sybailas jemqorlyqtyń júieli túri boiynsha 7 qylmys tirkelse, memlekettik baǵdarlamalar aiasynda bólingen qarajattardy urlaý faktisimen 16, shaǵyn jáne orta biznes jumysyna zańsyz aralasý boiynsha 9 derek tirkelgen.
«Departament jumysynyń nátijesinde 80-ge jýyq kásipkerdiń quqyǵy qorǵaldy. Munan basqa departament memlekettik organdardyń jáne kvazimemlekettik sektordyń basshylary tarapynan jasalǵan sybailas jemqorlyq faktilerin anyqtaý jumystaryn atqaryp jatyr. Atap aitqanda, biyl oblys deńgeiindegi basshylarǵa qatysty 7 qylmys tirkelip otyr. Byltyr 3 qylmystyq is tirkelgen bolatyn. Olardyń ishinde oblys ákimdigi basqarmalarynyń 4 basshysyna, 1 kvazimemlekettik mekeme basshysyna jáne óńirlik departamentterdiń 2 basshysyna qatysty qylmystyq is qozǵaldy. Buǵan qosa, 7 qylmys qala, aýdan deńgeiindegi basshylarǵa qozǵalsa, 4 qylmys aýdandyq okrýgterdiń ákimderine qatysty tirkeldi», - dedi departament basshysy.
Ádilhan Áshirbaevtyń atap ótýinshe, búginde 105 is sotqa joldandy. 8 is qysqardy. Jasaǵan zańsyz is-áreketi úshin 70 tulǵa qylmystyq jaýapkershilikke tartyldy.
«Tirkelgen qylmystyq ister boiynsha 827 mln teńge kóleminde zalal keltirilgen bolsa, onyń 600 mln teńgeden astamy óndirip alyndy. 160 mln teńgeniń múlkine tyiym salyndy. Budan basqa syibailas jemqorlyq derekteri týraly habarlaǵan azamattardy kótermeleý bóliginde atqarylǵan aldyn alý jumystarynyń nátijesinde jyl basynan beri 30 azamatqa 4,8 mln teńge kóleminde syiaqy tólendi», - dedi ol.
