Jambyl oblysyndaǵy "Qaralma" taý-shańǵy bazasy 2019 jyldyń qańtar aiynda ashylady, dep habarlaidy QazAqparat tilshisi.
Bul týraly Jambyl oblysynyń ákimi Asqar Myrzahmetov Ortalyq kommýnikatsiialar qyzmetinde óńirdiń áleýmettik-ekonomikalyq damýyna arnalǵan baspasóz máslihatynda aitty.
Kýrorttyq taý-shańǵy bazasy Jýaly aýdanynyń Qaralma shatqalynda ornalasqan. Qaralma shatqaly Jambyl men Ońtústik Qazaqstan oblystarynyń ortasynda ornalasqan jáne halyqaralyq «Batys Eýropa - Batys Qytai» avtodálizinen 10 shaqyrym jerde tur. Bul týristerdiń jol-jónekei soǵyp, emin-erkin demalyp ketýine múmkindik beredi.
"Zaman talabyna sai taý-shańǵy bazasy qurylysynyń ázirge 60 protsenti aiaqtaldy. Jaqynda ǵana qurylys barysyn tekserip keldik. Árine, qazirgi aýa raiy qurylysqa qolaisyz, degenmen barlyq ornatý jumystary 2019 jyldyń basynda aiaqtalady dep josparlap otyrmyz. Aspaly joldardyń barlyǵy satyp alynǵan jáne qazir ornatylyp jatyr", - dep jaýap berdi A. Myrzahmetov jýrnalister suraǵyna.
Onyń aitýynsha, dene tárbiesi men buqaralyq sportty damytý úshin aldaǵy úsh jylda óńirde 30 sport keshenin turǵyzý josparlanǵan. Onyń ishinde jeńil atletika jáne gimnastikalyq manejder, muz saraiy jáne taý-shańǵy bazasy bar.
