Jambyl oblysynyń Moiynqum aýdanyndaǵy iri dala órtiniń taralýy toqtatyldy, dep habarlaidy "Ult aqparat" Tótenshe jaǵdailar komitetine silteme jasap.
Eske sala ketsek, 18 shilde kúni keshke Jambyl oblysynyń Moiynqum aýdanyndaǵy Moiynqum aýylynan 180 shaqyrym jerde qýraǵan shóp pen sekseýil órtengen. Ony sóndirýge 266 adam, 61 tehnika jáne 1 tikushaq jumyldyryldy. Bul Jambyl oblysynyń TJD, «Moiynqum, Baizaq, Merki, Qosqudyq, Qordai jáne Jýaly orman jáne janýarlar dúniesin qorǵaý jónindegi mekemeleri» KMM, Moiynqum aýdanynyń erikti órt sóndirý qurylymdary, «Qazaviaormanqorǵaý» RMK kúshteri.
21 shildede saǵat 09:45-te shamamen 18 myń gektardy sharpyǵan órttiń taralýy shekteldi. Jaǵdaidy baqylaý úshin «Qazaviaqutqarý» mekemesiniń MI-2 tikushaǵy aýmaqtyń ústinen ushyp ótti.
15 m/s kei jerlerde jyldamdyǵy 23 m/s jetken kúshti jel órtti sóndirýge kedergi jasady. Dala órti eldimekenderge qaýip tóndirmedi.
Aita keterligi, tek 20 shildede 27 tabiǵi órt tirkelgen. Tótenshe jaǵdailar komiteti Aqtóbe, Shyǵys Qazaqstan, Jambyl, Pavlodar, Qostanai, Qaraǵandy oblystaryndaǵy 15 tabiǵi órtti baqylaýda ustap otyr. Onda órtterdi sóndirý úshin barlyq sharalar qolǵa alynǵan.
Budan basqa, keshe Aqtóbe, Shyǵys Qazaqstan, Jambyl, Batys Qazaqstan, Qaraǵandy, Qostanai oblystarynda daladaǵy qýraǵan shóp órtenip, olar sóndirildi.
Osy óńirlerde dala órti jalpy aýdany 4 501 gektardy sharpyǵan. Onyń ishinde Aqtóbe oblysyndaǵy órt 3 600 gektarǵa taralǵan. Órtti sóndirýge TJD, erikti órt sóndirý quramalary, orman sharýashylyqtarynyń kúshteri jumyldyryldy.
