Jambyl oblysy ákimdiginde aimaq basshysy Asqar Myrzahmetovtyń qatysýymen arnaiy jiyn ótti. Jiynda ótken jylǵy qol jetkizilgen kórsetkishter, áleýmettik-ekonomikalyq damý men respýblikalyq biýdjettiń atqarylýynyń qorytyndysy jáne aǵymdaǵy jyldyń jospary qaraldy.
Oblys ákimdiginiń ekonomika jáne biýdjettik josparlaý basqarmasynyń málimetine súiensek, 2018 jyldyń qańtar-jeltoqsan ailarynyń qorytyndysy boiynsha ekonomikanyń barlyq salalarynda 4-5 paiyz ósim baiqalǵan. Jyl sońynda oryndalmai qalý qaýpi bolǵan ónerkásiptegi ónim kólemi, kurylys, investitsiia kórsetkishteri boiynsha jospar jyldyń qorytyndysymen oidaǵydai qalyptasqan. Atap aitar bolsaq, ónerkásip óniminiń naqty kólem indeksi jyl qorytyndysymen 102,6 paiyz, qurylys 105 paiyz, negizgi kapitalǵa salynǵan investitsiia kólemi 108, 4 paiyzǵa oryndalǵan. Qarjy igerýde de oń dinamika saqtalǵan.
Asqar Isabekuly ekonomikalyq kórsetkishterdegi oń dinamika bir jyldyq tynymsyz eńbektiń nátijesi ekendigin jetkizdi. Ásirese, ónerkásiptegi ónim kóleminiń ósimi orta jáne shaǵyn kásipkerlikterdi jandandyrý, kásiporyndardyń ónimdilik júktemelerin arttyrý arqyly múmkin bolǵanyn airyqsha atap ótti.
Óńir basshysy ótken jylǵy nátijemen toqtap qalýǵa bolmaitynyn, aǵymdaǵy jyly atqarylatyn sharýalar odan da aýqymdy ekenin basa aitty. Erteńnen bastap barlyq basqarma men aýdandardyń jyldyq jumysynyń qorytyndysy egjei-tegjeili qaralyp, baǵasy shyǵarylmaq. Aita ketý kerek, aldaǵy qorytyndy-baǵalaý jiyndary jańa formatta, iaǵni, naqty kezdesip otyrǵan ózekti máseleler, onyń sheshý joldaryn qarastyrý boiynsha ótedi.
Sondai-aq, oblystaǵy 30 aýmaqtyq departament, inspektsiia jáne basqarmalarmen birlesip jumys jasaý jolǵa qoiylmaq. Ol úshin oblys ákimdiginiń salalyq basqarmalary jumys josparyndaǵy mindettemelerge barlyq departament pen inspektsiialardy qatystyrý kózdelýde. Oblys ákimdigi men basqarmalardyń, basqarma men aýdan ákimdikteriniń arasyndaǵy memorandýmdaǵy indikatorlardyń birqatary qaita naqtylanady.
Jiynda oblys ákimimen bekitilgen media-jospardyń oryndalýy, basqarmalar men aýdan ákimderiniń baspasóz mamandarynyń jumystaryn jandandyrý máseleleri de qaraldy.
