Jambyl oblysy Densaýlyq saqtaý basqarmasynyń basshysy Marat Jumanqulov koronavirýs juqtyrǵandardyń densaýlyq jaǵdaiy týraly aityp berdi, dep habarlaidy QazAqparat.
«Sońǵy ótken táýliktiń ishinde Jambyl oblysynda koronavirýs indetin juqtyrýdyń eki oqiǵasy tirkeldi. Jalpy, tirkelgen úsh oqiǵaǵa toqtalsaq, olardyń bir-birimen bailanysy joq. Biraq osy adamdardyń barlyǵy Qyrǵyzstannan kelip otyr. Bul adamdar Qazaqstanǵa ár kúnderi kelgen», - dedi M. Jumanqulov Habar 24 telearnasynda ótken onlain brifingte.
Onyń sózine qaraǵanda, bir azamat Qordai aýdanynyń 1974 jylǵy turǵyny.
Qyrǵyzstannan shekarany ótken kezde, bekitilgen tártipke sáikes, karantinge oqshaýlanǵan. Zertteý nátijesinde infektsiia shyqqannan keiin, bul naýqaspen tyǵyz qarym-qatynasta bolǵan adamdar anyqtaldy. Búgingi tańda olardyń barlyǵy oqshaýlandy.
«Úshinshi oqiǵa boiynsha toqtalsaq, naýqas Qordai aýdanynyń turǵyny. Bul azamat ta bizge Qyrǵyzstannan ótip otyr. Bekitilgen algoritm boiynsha barlyq memlekettik organdar tiisti jumystardy atqaryp, osy kisimen qarym-qatynasta bolǵan adamdardy anyqtady. Ol adamdar karantindik statsionarǵa jatqyzylǵan», - dep naqtylady basqarma basshysy.
Onyń atap ótýinshe, indet juqtyrǵan adamdardyń densaýlyq jaǵdaiy bir qalypty.
«Olardyń densaýlyqtaryna shaǵym joq. Bekitilgen tártip boiynsh em-dom jasalýda. Oqshaýlanǵan adamdardyń da jaǵdaiy qanaǵattanarlyq, iaǵni densaýlyqtaryna shaǵym joq. Olardyń barlyǵy meditsinalyq baqylaýda bolady», - dedi Marat Jumanqulov.
Aita keteiik, Jambyl oblysynda indetke shaldyǵýdyń alǵashqy jaǵdaiy 24 naýryzda tirkeldi. Ol - Jambyl oblysy Shý aýdanynyń turǵyny. Óńirge Qyrǵyzstan Respýblikasynan kelgen. 24 naýryz kúni oblystyq karantindik statsionarǵa jatqyzyldy.
