Jambyl oblysy ákiminiń ókimimen Qazaqstan Respýblikasy Prezidenti Ákimshiliginiń jáne aýdandyq máslihat depýtattarynyń kelisimimen Baqytjan Jaqsylyqov Sarysý aýdanynyń ákimi bolyp taǵaiyndaldy, dep habarlaidy QazAqparat.
Oblys ákimi Berdibek Saparbaev jańa basshyny aýdan aktivine tanystyrdy.
Óńir basshysy aýdannyń jańa ákimine aýdannyń áleýmettik-ekonomikalyq damýy, zańdylyq pen tártiptiń saqtalýy, qoǵamdaǵy birlik pen kelisimdi nyǵaitý boiynsha birqatar mindetter júktedi.
- Sarysý aýdanynyń áleýeti zor. Munda óndiristik sektor, aýyl sharýashylyǵy jáne kásipkerlik júieli túrde damýda. Aýdannyń jańa basshysy osy qarqyndaǵy jumysty jalǵastyrýy tiis. Prezident Qasym-Jomart Toqaev «Halyq úninen qulaq asatyn memleket» tujyrymdamasyn qalyptastyrýdy tapsyrdy. Jergilikti ákimder halyqqa jaqyn bolyp, máselelerdi birge sheshýi kerek, - dedi oblys ákimi.
Baqytjan Jaqsylyqov aimaq basshysyna senim artqany úshin alǵysyn bildirip, Sarysý óńirin damytý jolyna bar kúsh-jigeri men múmkindikterin jumsaitynyn jetkizdi. Baqytjan Alpysuly 1972 jyly Jambyl oblysy Sarysý aýdanynda dúniege kelgen. Qazaq Ulttyq tehnikalyq ýniversitetin «injener-qurylysshy» mamandyǵy boiynsha bitirgen. Eńbek jolyn 1995 jyly Qazaq ulttyq tehnikalyq ýniversitetinde oqytýshy bolyp bastaǵan.
Ár jyldary Sarysý aýdany ákimi apparatynyń, aýdandyq Zeinetaqy tóleý jónindegi ortalyǵynyń bas mamany, aýdan ákimi apparatynyń bas inspektory, bólim meńgerýshisi, shaǵyn jáne orta kásipkerlikti qoldaý jónindegi aýdandyq komitettiń tóraǵasy, Jańatas qalasynyń ákimi qyzmetterin atqarǵan.
Sondai-aq, Sarysý aýdany ákiminiń apparatyn basqarǵan. Sarysý aýdany ákiminiń orynbasary, Taraz qalasy ákimdiginiń turǵyn úi-kommýnaldyq sharýashylyǵy, jolaýshylar kóligi jáne avtomobil joldary bóliminiń basshysy laýazymdarynda bolǵan. 2019 jyldyń naýryz aiynan bastap «Taraz Qurylys Invest»kompaniiasynyń bas direktory bolyp jumys istep kelgen.
