Qorǵanys ministri Nurlan Ermekbaev órtten zardap shekken Jambyl oblysyndaǵy oq-dáriler qoimasynyń aýmaǵyn qarap shyqty, dep habarlaidy "Ult aqparat" vedomstvonyń baspasóz qyzmetine silteme jasap.
Oqiǵa ornynda ol Tótenshe jaǵdailar ministri Iýrii Ilin jáne Jambyl oblysynyń ákimi Berdibek Saparbaevpen keńes ótkizdi.
«Órt saldaryn joiýǵa qatysty birlesken is-qimyldar úilestirildi. Negizgi kúsh-jiger halyqtyń qaýipsizdigin 100% qamtamasyz etýge baǵyttalǵan.
«Ońtústik» óńirlik qolbasshylyǵynyń injenerlik áskerleri oq-dáriler qoimasynyń aýmaǵyn tazartýǵa kiristi. Bólimsheler qalyptyq mina tartqyshpen jabdyqtalǵan injenerlik jáne brondy transporterlerdi paidalanýda», delingen habarlamada.
Áskeri saperler temirjol ýchaskesi men jaqyn mańdaǵy eldi mekenderge injenerlik barlaý jáne tazalaý jumystaryn júrgizdi.
