Jambyl oblystyq Politsiia departamentiniń politsiia qyzmetkerleri joǵalyp ketken 15 jastaǵy jasóspirim qyzdy tapty, - dep habarlaidy "Ult aqparat".
Eske sala keteiik, osydan úsh kún buryn T.Rysqulov aýdany Qulan aýylyndaǵy 15 jasar qyzdyń úiinen tańerteń belgisiz baǵytta shyǵyp ketip, qaita oralmaǵandyǵy týraly habarlanǵan bolatyn. Jasóspirimniń aqyl-oiy artta qalǵan jáne úiden oqytylatyn bolǵan.
Politsiia qyzmetkerleri balany izdeý boiynsha dereý sharalar qabyldap, oǵan eriktiler de jumyldyrylǵan. Olar qyzdy 3 kún boiy izdegen.
Aýyl jáne jaqyn aýdandardyń turǵyndary arasynda saýalnama alynyp, jasóspirimniń qurdastarymen jáne synyptastarymen áńgime júrgizilgen. T.Rysqulov aýdandyq politsiia bóliminde joǵalyp ketken qyzǵa qatysty sotqa deiingi tergeý bastalǵan. Qabyldanǵan sharalar nátijesinde qyz Jambyl aýdany Aisha bibi aýylynan tabyldy.
Balanyń aitýynsha, ol ájesine renjip, Taraz qalasyndaǵy ápkelerine barǵan. Janjaldan keiin boijetken vokzal aimaǵyna baryp, ótip bara jatqan kólikterden ony qalaǵa jetkizýin ótingen. Tarazǵa jetkende ápkeleriniń úiinde joq ekenine kóz jetkizgen. Áleýmettik jeli arqyly tanysyna habarlasyp, Jambyl oblysynyń Aisha bibi aýylyna baryp, sonda 3 kún turaqtaǵan. Ony politsiia qyzmetkerleri taýyp, ata-anasyna jetkizdi.
«Búginde joǵalyp tabylǵan jasóspirimniń ómiri men densaýlyǵyna eshqandai qaýip tónip turǵan joq», - delingen habarlamada.
