Jambyl oblysynyń Baizaq aýdanyndaǵy jarylys saldarynan 3 mektepke zaqym kelgen. Bul týraly Jambyl oblysynyń ákimi Berdibek Saparbaev BAQ ókilderine bergen suhbatynd aitty, dep habarlaidy QazAqparat.
BAQ ókilderine bergen suhbatynda aimaq basshysy Berdibek Saparbaev jarylystan zaqym kelgen áleýmettik nysandardyń jaǵdaiy týraly málimet berdi.
«Áleýmettik nysandarǵa qatysty toqtalsaq, 3 mektepke zaqym kelgen. Ásirese, qatty zardap shekkeni – Jibek Joly aýylyndaǵy bilim ordasy. 118 bala oqityn bilim mekemesiniń irgesi 1956 jyly qalanǵan. Eski mekteptiń ornyna jańa ǵimarat salý kerek degen sheshim qabyldandy. Aýyl halqynyń sany ósip jatqanyn eskere otyryp, Úkimetke 150 oryndyq jańa mekteptiń qurylysy boiynsha usynys joldaimyz. Jańa mekteptiń orny belgilendi, qujattary barynsha qysqa ýaqytta daiyndalady. Jeńil zaqymdalǵan Úshbulaq pen Bazarbai aýyldaryndaǵy mektepter demeýshilerdiń esebinen qalypqa keltirilip jatyr. Olar birinshi qyrkúiekke deiin daiyn bolady. Dál sondai jeńil zaqym kelgen meditsinalyq pýnkt te bir apta ishinde tolyǵymen jóndeledi», - dedi BerdibekSaparbaev.
Sondai-aq, oblys ákimi Jarylystan búlingen úilerdiń bári 2 aida qalpyna keltiriletinin aitty.
Jóndeýdi qajet etedi delingen 106 úidiń 35-ine kúrdeli jóndeý taǵaiyndalyp otyr. Oblystyq jedel shtab qalǵan 71 úidi jeńil zaqymdaldy dep tanyǵan.
«Olar da qalpyna keltiriledi. Barlyq jumystarǵa Úkimet tarapynan qaralatyn jáne jergilikti biýdjetten qosymsha bólinetin qarajat jumsalady. Óńirdegi demeýshiler de qarjylai kómek kórsetedi. Búgin bir úidiń kúrdeli jóndeý jumystary bastaldy.Qalǵan úilerde qurylysshylar erteńnen bastap iske kirisedi. Eki aidyń ishinde barlyq úilerdi qalpyna keltiremiz dep ózimizge mindetteme alyp otyrmyz. Oǵan bizdiń múmkindigimiz de, qurylysshylar kúshi de jetkilikti»,-dedi oblys ákimi.
