Jambyl oblysynyń politseileri boryshkerlerden úsh kúnde memleket kirisine 22,5 millionnan astam teńge óndirip aldy, dep habarlaidy "Ult aqparat".
Jambyl oblysynyń aýmaǵynda «Boryshker-2020» jedel aldyn alý is-sharasy ótti. Shara salynǵan ákimshilik aiyppuldardy ýaqtyly óteý qajettiligi týraly halyqty habardar etý maqsatyna negizdeldi.
Joldardaǵy reidter kezinde politsiia qyzmetkerleri arnaiy avtokólikterde ornatylǵan «Avtoýragan» júieleriniń kómegimen tiisti derekter bazasy boiynsha júrgizýshilerdi tekserdi.
«Aiyppuldy qasaqana tólemeýshilerge qatysty QR ÁQBtK-niń 669-baby boiynsha ákimshilik hattamalar jasaldy. Jedel-aldyn alý is-sharasynyń nátijeleri boiynsha boryshkerlerden óndirip alynǵan somma 22 million 636 myń teńgeni qurady. Sot oryndaýshylarynyń qaýlylary boiynsha 81 avtokólik quraly arnaiy turaqqa ornalastyryldy», - delingen oblystyq Politsiia departamenti baspasóz qyzmetiniń habarlamasynda.
Jambyl oblysynyń Politsiia departamenti ákimshilik aiyppul salynǵan jaǵdaida, jeti táýlik ishinde kórsetilgen somanyń 50 paiyzyn tóleýge bolatynyn, al bul merzim ótip ketse aiyppuldy tolyq kólemde tóleitinin eske saldy.
