Jambyl oblysynda taýly aýmaqtaǵy janý oqiǵasynyń saldaryn joiý jumystary jalǵasýda,- dep habarlaidy QazAqparat.
Jambyl oblysy Turar Rysqulov aýdanynyń taýly jerlerinde oryn alǵan órt aýyzdyqtaldy. Qazirgi ýaqytta zardap shekkender týraly aqparat túsken joq.
Aldyn ala boljam boiynsha, órt turǵyndardyń ot qoldanýdaǵy abaisyzdyǵy saldarynan oryn alǵan.
Tilsiz jaýdy aýyzdyqtaýǵa 277 adam men 42 tehnika jumyldyryldy.
Sondai-aq, «Qazaviaqutqarý» MI-8 tikushaǵy tartyldy. Bul týraly tótenshe jaǵdailar departamentiniń baspasóz qyzmeti málim etti.
«Ushý nátijeleri boiynsha aldyn ala esepteýlerge sáikes órttiń aýmaǵy 650 gektardy quraidy, «Qazaviaqutqarý» AQ MI-8 tikushaǵymen jeke quramdy biik jerge jetkizý boiynsha ushýlar júrgizilýde. Qazirgi tańda joǵaryda atalǵan kúshter men quraldar taýly aýmaqtaǵy janý oqiǵasynyń saldaryn joiý jumystaryn jalǵastyrýda», - delingen vedomstvo habarlamasynda.
