Eki myń jyldan asa tarihy bar Jambyl óńiriniń tarihy da, tarihi-mádeni qundylyqtary óte bai. Qazaq handyǵynyń dáýirinen beri jasap kele jatqan tarihi ólkeniń qundylyqtary jas urpaqqa, jańa býynǵa nasihattalýy tiis. Elbasynyń «Rýhani jańǵyrý» baǵdarlamalyq maqalasynyń «Týǵan jer» arnaiy jobasy aiasynda osyndai qundylyqtardy jas býynǵa tanystyryp, olardyń ult aldyndaǵy paryzdaryn naqtylap beretin qyrýar jobalar júzege asyp jatyr. Solardyń eń irileriniń biri – ár ólkeniń óz tarihyn, mádenietin, qundylyqtaryn tanystyratyn «Ólketaný» oqý quralynyń jaryq kórýi.
5-7 synyptarǵa arnalǵan «Ólketaný» oqýlyǵynyń árbir aimaqqa jeke-jeke jasalǵanyn aldyńǵy maqalalarda aityp kelemiz. Almaty oblysy, Aqmola oblysy ózderiniń jańa oqýlyqtaryn arnaiy tanystyryp, tusaýkeser rásimin ótkizdi. Al búgingi jazbamyzda qasietti Jambyl oblysynyń erekshelikterin, qasietti jerlerin, kóne tarihtaǵy tunba muralaryn qamtyǵan «Ólketaný. Jambyl oblysy» kitaby týraly, onyń saltanatty tusaýkeser rásimi týraly aitpaqpyz.
«Ólketaný. Jambyl oblysy» atty oqý quralynyń tanystyrý rásimi Jambyl oblystyq bilim basqarmasynyń májilis zalynda atalmysh basqarmanyń uiymdastyrýymen ótti. Memleket basshysynyń «Bolashaqqa baǵdar: rýhani jańǵyrý» baǵdarlamalyq maqalasy aiasynda jaryq kórgen kitaptyń tusaýkeser saltanatyna oqýlyqty qurastyrǵan avtorlar, ǵalymdar, ǵalymdar men qoǵam qairatkerleri, ólketanýshylar men tájiribeli muǵalimder qatysty.
«Ólketaný» oqýlyǵynyń baǵdarlamasy 2017 jyldyń 10-tamyzynda Qazaqstan Respýblikasynyń Bilim jáne ǵylym ministrliginiń arnaiy buiryǵymen bekitildi. Ybyrai Altynsarin atyndaǵy Ulttyq bilim akademiiasy «Ólketaný» oqýlyǵyn ázirleý barysynda usynystar jasaǵan edi. Oqý quralyn jazý barysynda sol usynystarǵa mán berildi. «Ólketaný» oqýlyǵynyń jobasy jasalǵannan keiin oblys ákimdiginiń janynan qurylǵan redaktsiialyq keńeste, QR Bilim jáne ǵylym ministrliginiń pándik jáne eksperttik komissiialarynda, avtorlyq jumysshylar tobynyń otyrystarynda saraptalyp, talqyǵa tústi. Oqýlyqtyń elektrondy nusqasy ústimizdegi jyldyń naýryz aiynan bastap oblystyq bilim basqarmasynyń saityna ornalastyrylyp, aldyn-ala eldiń, ustazdardyń pikirleri tyńdaldy», - dedi oblystyq bilim basqarmasy basshysynyń orynbasary Jámilá Bekbatyrova.
Kezek boiynsha sóz alǵan oblystyq bilim basqarmasyna qarasty oqý-ádistemelik kabineti basshysynyń orynbasary Bigeldi Tájibaev sharaǵa qatysýshylardy, ustazdardy, óńirdiń qurmetti pedagogtaryn «Ólketaný. Jambyl oblysy» oqýlyǵynyń jalpy mazmunymen tanystyrdy. Oqý quraly ózge óńirlerdiń oqýlyǵy sekildi tarih, ádebiet, geografiia, mýzyka sekildi pánderdi qamtidy. Oqýlyqtyń qurylymy «Qymbatty balalar!», «Kirispe» jáne «Qorytyndy» siiaqty bólimderden turady. Ol óz sózinde atalǵan oqýlyqtyń aimaq jastaryn óz jerlerin súiýge, onyń barlyq murasyn, qundylyqtaryn qasterlep ustaýǵa, kóz qarashyǵyndai qorýǵa tárbielep, tarihi-mádeni, geografiialyq, filologiialyq, estetikalyq bilimderin damytýǵa kómektesetinin aitty.
Saltanatty tusaýkeser rásimine kelgen Jambyl oblysynyń Qurmetti azamaty Elen Álimjan, M.H.Dýlati atyndaǵy Taraz memlekettik ýniversitetiniń oqytýshysy Ziba Qulamanova, sonymen qatar, redaktsiialyq keńestiń ózge de músheleri óz oilarymen bólisti. «Almatykitap» baspasynan jaryq kórgen kitaptyń ishinde qandai maǵlumattar, derekter qamtylǵany týraly sóz órbip, atalǵan málimetterdiń mańyzdylyǵy týraly áńgime qozǵaldy.
«Ólketaný. Jambyl oblysy» oqýlyǵynda Taraz topyraǵyndaǵy tarihi oqiǵalar men eskertkishter, tulǵalar týraly málimetter, jer-sý ataýlarynyń tarihy qamtylǵan. Sondai-aq, atalmysh oqý quralynda óńirde týyp-ósken Sherhan Murtaza, Myrzatai Joldasbekov, Asanáli Áshimov, Ómirbek Baigeldi sekildi jazýshylar, ǵalym jáne memleket qairatkerleri jáne Iliia Jaqanov, Altynbek Qorazbaev sekildi án áleminiń alyptary týraly ómirbaiandyq materialdar jazylǵan.
Aldaǵy oqý jylynan bastap mektep baǵdarlamasyna engizilgen «Ólketaný. Jambyl oblysy» oqýlyǵy 5-synyp oqýshylaryna 5 saǵat, 6-synyp oqýshylaryna 7 saǵat jáne 7-synyp oqýshylaryna 8 saǵat kóleminde oqytylmaq.
