Jambyl oblysy Talas aýdanynda Qasqabulaq aýyly bar. Bul aýylda qazirgi tańda eshqandai ishimdik túri satylmaidy, dep habarlaidy "Ult aqparat".
Atalǵan shaǵyn aýylda 1937 jyldan beri kúrdi diasporasy toptasyp tirshilik keshýde. Olar negizinen mal sharýashylyǵymen ainalysady. Aita ketý kerek, bul aýyldyń ózindik ereksheligi bar. Ol – sońǵy jyldary eldi mekende birde-bir qylmystyń oryn almaǵandyǵy, ataýly áleýmettik kómek alýshylardyń tirkelmegendigi, aýyl dúkenderinde ishimdik satylmaityndyǵy desek bolady.
Qasqabulaqtyqtar bastamashyl ári eńbekke beiim. Aýylda myńǵa jýyq halyq týrady. Ondaǵy ár otbasyda shamamen 5-6 baladan bar desek, aýyl turǵyndarynyń deni jastar. Bul týraly jýyrda oblys ákimi Berdibek Saparbaev aýdanǵa jumys sapary barysynda atalǵan aýyldyń turǵyndarymen kezdesýde belgili bolǵan.
Berdibek Saparbaev aýyldaǵy 2018 jyly paidalanýǵa berilgen, búginde 135 oqýshy bilim alatyn orta mekteptiń jumysymen tanysyp, jergilikti klýbta aýyl turǵyndarymen kezdesken bolatyn.
«Biz bárimiz – Qazaqstan Respýblikasynyń azamattarymyz. Talai syndarly kezeńderdi birge keship, soǵys jyldaryndaǵy aýyr sátterdi birge eńserdik. Búginde bizdiń basty bailyǵymyz – qoǵamdaǵy beibitshilik pen berik dostyǵymyz ekenindigine eshkim kúmán keltire almaidy. Osy oraida óskeleń urpaqty ulttyq bolmys pen úlkenderdi qurmetteý sekildi asyl qasietter aiasynda tárbieleýge asa kóńil bólý qajet», - dep atap ótken edi aimaq basshysy.
