Jambyl oblysynda infektsionist dáriger shaǵymynan soń aýrýhana basshylyǵy qyzmetinen ketti. Bul týraly Jambyl oblysy ákimdiginiń baspasóz qyzmeti habarlady.
"Komissiia [Merki] aýdandyq aýrýhanasy jumysynyń, onyń ishinde dárigerler T.Ordabaeva men Q.Tórequldyń ótinishterinde kórsetilgen faktilerdi tekserdi. Kóptegen málimetter rastaldy. Ujymda jaǵymsyz moraldyq-psihologiialyq jaǵdai qalyptasqan. Oǵan birinshi kezekte emdeý mekemesi basshylyǵynyń kásibi mindetterine jaýapsyz qaraǵany sebep bolǵan. Sol sebepti aýrýhananyń bas dárigeri mindetin atqarýshy, bas dárigerdiń emdeý isi jónindegi orynbasary jáne bas esepshi qyzmetinen bosatyldy" dedi Jambyl oblysy ákiminiń orynbasary Erjan Jylqybaev.
Buǵan deiin Jambyl oblysy Merki aýdandyq emhanasynda koronavirýs juqtyrǵan dáriger Tolqynai Ordabaeva aýrýhanadaǵy jaǵdaiǵa shaǵymdanǵan bolatyn. Dárigerdiń aitýynsha, aýrýhanada maska men qorǵanysh kiim jetpeidi. Dárigerlerdiń qaýipsiz jumys isteýine jaǵdai jasalmaǵan.
Oblys ákimdigi ókilderi 11 sáýirde aýdandyq aýrýhanada jinalys ótkizip, meditsinalyq qyzmetkerlerdiń quqyǵyn qorǵaý, olardy qorǵanysh quraldarymen qamtamasyz etý máselesine erekshe mán beriletinin aitqan. Ujymǵa jańa bas dáriger Raiqul Nurjanovty tanystyrǵan. Jambyl oblysy ákiminiń orynbasary Erjan Jylqybaev aýrýhana jaǵdaiyna shaǵymdanǵan dárigerler Ordabaeva men Tórequl zańsyz áreketterden qoryqpasa da bolady dep aitqan.
Sońǵy málimet boiynsha, Jambyl oblysynda 46 adamnan koronavirýs tabylǵan. Qazaqstanda barlyǵy 120-dan astam dárigerge virýs juqqan.
Buǵan deiin densaýlyq saqtaý ministrligi koronavirýspen kúresip jatqan dárigerlerdiń jalaqysyna 250-850 myń teńge aralyǵynda ústeme aqy qosylatynyn, kásibi mindetin atqarý kezinde koronavirýs juqqan dárigerlerge 2 mln teńge kóleminde saqtandyrý tólemi beriletinin aitqan.
