Jambyl oblysy Moiynqum aýdanynda gaz qubyrlaryn júrgizý jumystary bastaldy. Birer jylda aýdan aýmaǵynyń 9 eldi mekeniniń (Aidarly, Birlik, Binazar, Nazarbekov, Kókjelek, Kúshaman, Jambyl, Moiynqum, Qylyshbai) turǵyndary kógildir otyn jaǵý múmkindigine ie bolady, dep habarlaidy Ult.kz «Moiynqum media ortalyǵyna» silteme jasap.
Aýdan ákimi Ermek Karentaevtyń aitýynsha, biyl úsh aýylǵa gaz qubyrlary tartylady.
"Moiynqum aýdanynyń 9 eldi mekenin gazdandyrý jobasynyń 1 kezeńine sáikes Shý aýdany Qonaev aýylyndaǵy Avtomatty gaz tarqatý stantsiiasynan (AGTS) Aidarly, Birlik jáne Binazar aýyldaryna gaz qubyrlaryn tartý jumystary júrip jatyr. Qubyrlar úzdiksiz jetkizilip jatyr. Jyl sońyna deiin merdiger - Asia Caspian Construction JShS 13 myń 600 metr qubyr júrgizý, jalǵaý jáne ony jer astyna kómý jumystaryn júrgizedi. Avtorlyq qadaǵalaýshy men tehnikalyq qadaǵalaýshy kompaniialar únemi tekserý jumystaryn júrgizip otyrady. Aýdan ákimdigi tarapynan bul jumystar qatań baqylaýda bolady", - deidi Ermek Amangeldiuly.
Aita keteiik, atalǵan jobany respýblikalyq biýdjetten qarjylandyrý úshin QR Energetika ministrligine 2024 jylǵa respýblikalyq biýdjetke 18,5 milliard teńgege ótinim usynylyp, qurylys jumystaryn bastaý úshin respýblikalyq biýdjetten 2024 jylǵa 600 million teńge qaraldy, "Samruq-Qazyna" AQ dividendi esebinen qosymsha 2 milliard teńge bólingen.
