Jambyl oblysynda oiyn apparattaryn zańsyz ornatqany úshin aýyl turǵyny sottaldy, dep habarlaidy QazAqparat Qarjylyq monitoring agenttigine silteme jasap.
Agenttiktiń Jambyl oblysy boiynsha aýmaqtyq departamentiniń qyzmetkerleri 37 jastaǵy Lýgovoe aýylynyń turǵyny D. Kemelbekovtiń zańsyz oiyn biznesin uiymdastyrǵanyn anyqtady.
«Tergeý barysynda D.Kemelbekovtiń azyq-túlik dúkeninen oryn jaldap, sertifikattalǵan «Lotomatic» terminaldary túrinde 3 oiyn apparatyn zańsyz ornatqany anyqtaldy. D.Kemelbekov sottaldy, apparattardy joiý úshin memleket kirisine alyndy», delingen habarlamada.
Vedomstvonyń málimetinshe, 2021 jyldyń basynan beri Jambyl oblysynda zańsyz oiyn biznesin uiymdastyrýdyń 8 dereginiń joly kesilgen.
Aita keterligi, jalǵan terminaldy shynaiydan ajyratý úshin telefon bolsa jetkilikti. Birinshiden, Lotomatic.kz saitynda Lotomatic resmi lotereia terminaldarynyń tizimin ashyńyz. Tizimdegi terminaldardyń kartadaǵy mekenjaiy kórsetilgen.
Ekinshiden, apparattaǵy QR kodty skanerlese, tekserý nátijesinde «Terminal sertifikattalǵan» degen jazý shyǵýy tiis.
«Eger Siz zańsyz oiyn apparattaryn úiińizdiń ne barǵan jerińizden tapsańyz, agenttiktiń +7 (7172) 70-84-78 senim telefonyna nemese áleýmettik jelilerdegi akkaýnttary arqyly habarlasýyńyzdy suraimyz», delingen habarlamada.
Qazaqstanda zańdy biznes retinde jasyryn elektrondy kazino jáne oiyn avtomattary jumys isteidi, alaida olardyń qyzmetine «Oiyn biznesi týraly» zańmen tyiym salynǵan.
