Sýret ashyq derekkózden alyndy
Búgin Senattyń jalpy otyrysynda depýtat Bekbolat Orynbekov Jambyl oblysyndaǵy birqatar strategiialyq nysandarǵa qarjy bólinbei qalǵanyn aitty, dep habarlaidy QazAqparat.
Onyń aitýynsha, Jambyl oblysynyń ákimdigi «2024-2026 jyldarǵa arnalǵan respýblikalyq biýdjetti» qalyptastyrý aiasynda ortalyq memlekettik organdarǵa jalpy 129 mlrd teńgege 163 biýdjettik investitsiialyq joba boiynsha ótinim bergen. Alaida, birqatar mańyzdy salalar qarjylandyrylmai qalǵan.
Depýtat Merki aýdanyndaǵy aýyldardy elektr energiiasymen jabdyqtaý, sondai-aq «Jaýǵash batyr» jáne «Qarataý» shekara zastavalaryndaǵy máselelerge erekshe nazar aýdardy. Aýyl turǵyndary Qyrǵyzstannan elektr qýatyn alýǵa jáne bul úshin joǵary tarif boiynsha tóleýge májbúr.
«Jaýǵash batyr aýylynyń turǵyndary kórshiles Qyrǵyz Respýblikasynan 1 kVt/saǵ úshin ortasha eseppen 90-100 teńge baǵamen elektr energiiasymen qamtamasyz etilgen. Al oblys halqy úshin «Jambyl Jaryq Saýda-2030» tarifiniń quny 1 kVt/saǵatyna 16 teńge. Bul aiyrmashylyq jergilikti halyqtyń narazylyǵyn týdyryp otyr. Joba iske asqan jaǵdaida Qyrǵyz Respýblikasynan elektr energiiasy boiynsha táýeldilikti joiýmen qatar, strategiialyq mańyzǵa ie «Jaýǵash batyr» jáne «Qarataý» shekara beketterin elektr energiiasymen jabdyqtaý máselesi oń sheshimin tabady», - dedi Bekbolat Orynbekov Úkimet basshysy Álihan Smaiylovtyń atyna joldaǵan saýalynda.
