Foto: Jambyl oblysynyń prokýratýrasy
Jambyl oblysynda kommýnaldyq menshikti naryqtyq qunynan 111 ese tómen zańsyz satý faktisi anyqtaldy, dep habarlaidy "Ult aqparat".
Talas aýdanynyń prokýratýrasy jyljymaityn kommýnaldyq múlikti zańsyz satý faktisin anyqtaǵan. 2008 jyly «Igilik» kommýnaldyq memlekettik kásipornynyń basshylyǵy konkýrs uiymdastyrmai osy mekemeniń óndiristik bazasyn tikelei úshinshi tulǵalarǵa 270 myń teńgege satqan. Jambyl oblysy prokýratýrasynyń málimetinshe, bazanyń baǵalaý quny - 30 mln teńge.
2022 jyly zańsyz menshik iesi nesie alý úshin múlikti mikrokredittik uiymǵa kepilge qoiǵan.
"Osy fakt boiynsha 18.10.2023 jyly Talas aýdanynyń prokýratýrasy Qylmystyq kodekstiń 362-babynyń 4-bóligi (laýazymdyq ókilettikterin asyra paidalaný) boiynsha kásiporynnyń burynǵy basshysyna qatysty sotqa deiingi tergep-tekserýdi bastady. Tergep-tekserý nátijeleri boiynsha qylmystyq is eskirý merzimi ótýine orai toqtatyldy", – dep qosty vedomstvo.
Sonymen qatar prokýrorlyq qadaǵalaý aktisi negizinde Jambyl oblysynyń Mamandandyrylǵan aýdanaralyq ekonomikalyq sotynyń 22.02.2024 jylǵy sheshimimen ákimdiktiń satyp alý-satý sharttary men kepildi jaramsyz dep taný týraly talap-aryzy qanaǵattandyryldy. 22.05.2024 jyly apelliatsiialyq saty birinshi satynyń sheshimin ózgerissiz qaldyrdy. Sot aktisi zańdy kúshine endi. Múlik memleketke tolyǵymen qaitaryldy.
