Qazaqstan Respýblikasynyń Tótenshe jaǵdailar ministri Iýrii Ilin Jambyl oblysyndaǵy oq-dáriler qoimasynda otpen arpalysyp qaza tapqan órt sóndirýshilerdiń týystaryna nagradalar tabystady, - dep habarlaidy "Ult aqparat" ministrliktiń baspasóz qyzmetine silteme jasap.
Shara Jambyl oblysy Tótenshe jaǵdailar departamenti órt sóndirý qyzmeti Taraz qalasy №2 mamandandyrylǵan órt sóndirý bóliminde ótti.
Sharaǵa qatysýshylar jarylys kezinde qaza tapqan órt sóndirýshilerdi bir minýt únsizdikpen eske aldy.
Eske sala keteiik, Memleket basshysy Qasym-Jomart Toqaev qyzmettik mindetterin oryndaý kezinde qaza tapqan Meiirjan Aimanovqa «Halyq qaharmany» ataǵyn berý týraly Jarlyqqa qol qoiǵan edi.
Azamattyq qorǵaý polkovnigi Meiirjan Aimanov Qorǵanys ministrliginiń №28349 áskeri bólimi aýmaǵynda oq-dáriler jarylysy saldarynan bolǵan qaiǵly oqiǵada óz qyzmettik mindetterin oryndaý kezinde qaza tapty. Ol óziniń kásibi, saýatty is-áreketi men jeke qaisarlyǵynyń arqasynda oqiǵa ornyna jaqyn ornalasqan 3 eldi mekenniń 710 turǵynyn Taraz qalasyna evakýatsiialady.
Sonymen qatar Memleket basshysynyń Jarlyǵymen áskeri jáne qyzmettik boryshyn atqarýda kórsetken erligi men janqiiarlyǵy úshin Jambyl oblysy tótenshe jaǵdailar departamenti órt sóndirý jáne avariialyq-qutqarý jumystary qyzmeti órt sóndirý kezekshi qyzmetiniń jedel kezekshisi (órt sóndirý jetekshisiniń orynbasary) Mikropýlo Aleksandr Nikolaevich I dárejeli «Aibyn» ordenimen, Jambyl oblysy Tótenshe jaǵdailar departamenti órt sóndirý jáne avariialyq-qutqarý jumystary qyzmeti № 3 órt sóndirý bóliminiń aǵa órt sóndirýshi-qutqarýshysy Sandybaev Eldos Qadyrbaiuly, Jambyl oblysy Tótenshe jaǵdailar departamenti órt sóndirý jáne avariialyq-qutqarý jumystary qyzmeti № 3 órt sóndirý bóliminiń órt sóndirýshi-qutqarýshysy Temirbolatov Arnur Serikuly, Jambyl oblysy Tótenshe jaǵdailar departamentiniń órt sóndirý jáne avariialyq-qutqarý jumystary qyzmeti № 1 mamandandyrylǵan órt sóndirý bóliminiń aǵa órt sóndirýshi-qutqarýshysy Tórebekov Táńirbergen Qudaibergenuly III dárejeli «Aibyn» ordenimen nagradtaldy.
«Iýrii Ilin Jambyl oblysynda bolǵan qaiǵyly oqiǵa kezinde qaza tapqan batyrlardyń týǵan-týystaryna kóńil aitty», - delingen QRTJM baspasóz qyzmeti tartqan aqparatta.
