Jambyl oblysynda 7194 adam qaterli isikpen esepte tur. Bul týraly Óńirlik kommýnikatsiialar qyzmetinde ótken brifingte oblystyq onkologiialyq dispanserdiń bas dárigeri Abai Nurjanov málimdedi, dep habarlaidy "Ult aqparat".
Ótken jyly 1582 adamnan alǵash ret obyr derti anyqtalǵan. Bul kórsetkish 2017 jyly 1596 adamdy quraǵan. Bul dert boiynsha ólim kórsetkishine kelsek, oblys boiynsha byltyr 813 aýrý qaitys bolsa, 2017 jyly 950 adam ajal qushqan. Tiisinshe, ólim kórsetkishiniń tómendegeni baiqalady. Bul oraida qaterli isikti erte anyqtaý, ýaqtyly emdeý jumysy jaqsaryp keledi degendi alǵa tarqan bas dáriger 2016-2019 jyldarǵa arnalǵan «Densaýlyq» baǵdarlamasy boiynsha ólim kórsetkishiniń indikatory 74,35 bolyp bekitilgenin jetkizdi.
«Óńirimizde qaterli isikpen alǵash ret aýyrǵan 1582 adamnyń 59,5 paiyzy syrqattyń I jáne II satysynda ekeni anyqtaldy. Demek, osynsha naýqastyń qajetti emdi ýaqtyly alsa, jazylyp ketý múmkindigi joǵary degen sóz. Jalpy, qaterli isikten bolatyn ólim-jitim kórsetkishin tómendetý úshin aýrýdy aldyn alý jáne aýrýdy erte satyda anyqtaý qajet», - deidi Abai Nurjanov.
Aita keteiik, 1-10 aqpan aralyǵynda respýblikanyń barlyq óńirinde Dúniejúzilik obyrǵa qarsy kúres kúnine arnalǵan onkologiialyq aýrýlardyń aldyn alý men erte anyqtaý týraly onkúndik ótýde.
