Qazaqstan Kommýnistik Halyq partiiasy (QKHP) QR Prezidenttigine úmitker Jambyl Ahmetbekovtyń respýblikalyq sailaýaldy shtabyn tanystyrdy, dep habarlaidy "Ult aqparat" partiianyń baspasóz qyzmetine silteme jasap.
«QKHP Ortalyq komitetiniń hatshysy, «Halyq kommýnisteri» fraktsiiasynyń jetekshisi, Parlament Májilisiniń depýtaty Aiqyn Qońyrov respýblikalyq sailaýaldy shtab jetekshisi bolyp bekitildi. Sailaýaldy tuǵyrnamamyzdy halyqqa jetkizý úshin erteńnen bastap aimaqtarǵa issaparǵa shyǵamyz. Sailaýaldy naýqan kezinde partiianyń baspasóz qyzmeti úzdiksiz jumys isteidi. Baspasóz qyzmetin Nazgúl Maqjan basqarady», - dedi Jambyl Ahmpetbekov jýrnalisterge arnalǵan brifingte.
Budan keiin ol respýblikalyq sailaýaldy shtab jetekshisine sóz berdi.
Respýblikalyq sailaýaldy shtab saiasi saiysqa saqadai sai ekenin tilge tiek etken Aiqyn Qońyrov: «Respýblikalyq sailaýaldy shtabtyń barlyq úgit-nasihat jumysy «Adal eńbek qoǵam múddesi úshin!» degen uranmen ótedi. Partiianyń sailaýaldy tuǵyrnamasy daýys berýshilerge sailaýǵa qatysýǵa mol múmkindik beredi, al sailaýshylar QazaqstanRespýblikasynyń Prezidenttigine úmitker Jambyl Ahmetbekovti qoldaidy dep úmittenemiz», - dedi.
Respýblikalyq shtab jetekshisiniń sózinshe, QR Prezidenttigine úmitkerdiń sailaýaldy tuǵyrnamasy batystyń yqpaly men jalǵan qundylyqtarynan bas tartýdy, barlyq qashqyn oligarhtardy sotqa tartýdy, kedeilikpen kúresti, kórshi eldermen ekonomikalyq integratsiiany sonymen qatar ádiletti salyq salý júiesin engizýdi temirqazyq tutady.
Óz kezeginde QKHP baspasóz qyzmetiniń jetekshisi Nazgúl Maqjan respýblikalyq sailaýaldy shtabpen qatar oblystardaǵy aimaqtyq sailaýaldy shtabtar ashylǵanyn málimdedi.
«Qazaqstan Kommýnistik Halyq partiiasy qalalyq, oblystyq, respýblikalyq deńgeidegi sailaýaldy naýqandy bastady. Jergilikti jerlerdegi sailaýaldy shtabtar ashylyp, sailaýaldy naýqanǵa qatysty jumystar bastalyp ketti», - dedi.
Shara sheńberinde QKHP Ortalyq komitetiniń hatshysy, «Halyq kommýnisteri» fraktsiiasynyń jetekshisi, Parlament Májilisiniń depýtaty, respýblikalyq sailaýaldy shtab jetekshisi A. Qońyrov QR Prezidenttigine úmitker J.Ahmetbekovpen respýblikalyq sailaýaldy shtabynyń jibek jibin kesti.
Is barysynda respýblikalyq sailaýaldy shtabtyń janynan qurylǵan kiiz úide Jambyl Ahmetbekov tusaý kesý rásimin ótkizdi.
QR Prezidenttigine úmitker Damir esimdi búldirshinniń tusaýyn kesip, oǵan bata berdi jáne Abai Qunanbaevtyń «Qara sózderin» syilady.
«Respýblikalyq sailaýaldy shtabtyń tanystyrylymy qasietti Ramazan aiymen tuspa-tus keldi. Buǵan qosa ata-ananyń ótinishi boiynsha is barysynda tusaý kesý rásimi jasaldy. Biz munyń barlyǵyn jaqsylyqqa balap otyrmyz», - dedi J. Ahmetbekov.
Aita keteiik, QKHP atynan Prezidenttikke úmitker J.Ahmetbekovtyń aimaqtardaǵy sailaýaldy úgit baǵdarlamasy Aqmola oblysynan bastaý alady. Aimaqtardaǵy sailaýaldy úgit baǵdarlamasy barysynda úmitker kásiporyndarda bolyp, jumys ujymdarymen kezdesý ótkizedi.
