Tuńǵyshbai Jamanqulov prezidentpen ne týraly sóileskenin, ómirindegi qiyn jaǵdaida janynan kim tabylǵanyn jáne Nurǵali Núsipjanovtyń úilenýi týraly ne oilaitytyn aitty, dep jazady Sputnik agenttigi.
"Qaraqatpen shai" baǵdarlamasynda akter ári rejisser Nurǵali Núsipjanovtyń ózinen 45 jas kishi kelinshekke úilenýine qatysty oiyn aitty. Ol belgili ánshini kinálaýdan aýlaqpyn dep otyr.
"Júrekke ámir júrmeidi. Mahabbat degen sezim qai kúni keletinin de bir Alla biledi. Men ol kisilerdiń qosylýyn júrek qalaýy dep eseptegim keledi. Júrekteriniń bir tartylys kúshi boldy-aý dep eseptegim keledi. Biraq kimniń ishine kim kirip shyqqan? Kinalaǵym kelmeidi. Jas máselesin oilaǵanda apyrmai nege bylai boldy eken degen tańdanys boldy", - deidi Jamanqulov.
Ol Nurǵali Núsipjanovtyń qai jaǵdaida da sabyrly ekenin atap ótti. Án salǵany da, óz-ózin ustaýy da mádenietti dep otyr.
"Nurǵali aǵamyz tik júrip, tik sóileitin, abailap sóileitin, qadamyn sanap basatyn adam. Bul kisiniń jeke taǵdyryn men bilmeimin. Birinshi jeńgemizdiń qaitys bolǵanyn, bes qyzy bar ekenin de bilmeidi ekenmin. Ózi sahnada án aitqanda da, emotsiiaǵa berilip, esi shyǵyp ketpei, óte mádenietti aitady ǵoi. Ol kisiden mundai shyǵady dep oilamaǵanym haq", - dedi akter.
Tuńǵyshbai Jamanqulovtyń jarymen jas aiyrmashylyǵy - 24 jas. Akter bolashaq jarynyń ustazy bolǵan.
"Men de ózimniń shákirtim Dáriiaǵa úilendim ǵoi. Esimnen tandyrdy, ǵashyq boldym, úilendim. Aramyz eki múshel jas. Eki ul, bir qyzymyz bar", - deidi Jamanqulov.
Júrgizýshiniń mundai jaǵdai taǵy da bolýy múmkin be degen suraǵyna: "Ol jaǵyn naqty aita almaimyn" dep kúldi.
Jamanqulov óziniń prezident qabyldaýynda bolǵanyn jáne Toqaevpen ne týraly sóileskenin de aitty. Akter Qazaqstandaǵy teatrlardy jaǵdaiy týraly maqala jazǵan. Keiin prezidenttiń kómekshileri habarlasyp, qabyldaýǵa shaqyrypty.
"Prezident joldaýynda óner adamdarynyń jalaqysy az ekenin aityp, kelesi jyldan bastap kóterý kerek dep úkimetke tapsyrma berdi. Kezdesý kezinde jeke másele týraly kóp aitylǵan joq. Osydan 1-2 jyl buryn meniń basyma túsken jaǵdailar jaiynda shet jaǵasyn surady. Sebep-saldaryn aityp berýge tyrystym", - deidi rejisser.
Qiyn jaǵdaida akterge jary men shákirtteri qoldaý kórsetken.
"Al áriptesterim janymnan tabylmady. Múiizi qaraǵaidai aǵalarym tabylmady. Ókpem qara qazandai dep aita almaimyn. Ony qazirgi zamanda arqalap júrý de ońai emes. Ókinish qana bar", - dedi akter.
Ol Joǵary sotqa aryz jazýdy josparlap otyr.
