Sanaýly kúnnen soń Oraza aiy bastalady. Osy oraida Oraza kezinde jamaǵatpen namaz oqýda maska taǵyp, araqashyqtyqty saqtaý mindetti emes. Bul týraly Qazaqstan musylmandary dini basqarmasy tóraǵasynyń orynbasary, naib múfti Ershat qajy Ońǵar málim etti, dep habarlaidy QazAqparat.
«Ózderińiz biletindei, mamandardyń aitýynsha sońǵy ýaqytta eldegi epidjaǵdai turaqtalyp, karantin talaptary shetinen alynyp jatyr. Osyǵan orai jamaǵatpen oqityn namaz kezinde maska taǵý árkimniń óz erkinde. Sonymen qatar namaz oqý kezinde araqashyqtyqty saqtaý da mindetti emes. Iaǵni qalypty jaǵdaida ótedi dep josparlap otyrmyz», - dedi naib múfti Ershat qajy Ońǵar Ortalyq kommýnikatsiialar qyzmetinde onlain ótken baspasóz máslihatynda.
Onyń aitýynsha, biylǵy Orazada 5 ýaqyt namaz el meshitterinde qalypty jaǵdaida oqylady.
«Búginde barlyq meshitterdiń esigi ashyq. Kez kelgen ýaqytta baryp, niet etip, qulshylyq jasaýǵa bolady. Sonymen qatar Oraza kezinde qaiyrymdylyq jasap, sadaqa berý mańyzdy. Osy oraida sadaqa berýdiń birneshe tásili bar. Atap aitqanda, meshitterdiń janynda arnaiy terminaldar qoiylǵan. Odan bólek, mobildi telefondaǵy túrli qosymshalar arqyly da sadaqa etý múmkindigi bar», - deidi ol.
