Ortalyq kommýnikatsiialar qyzmeti alańynda ótken baspasóz konferentsiiasynda Bas múfti Ramazan aiynda qandai jobalar júzege asyrylatynyn aitty, dep habarlaidy "Ult aqparat".
«Ózderińiz bilesizder, elimizde tótenshe jaǵdai jariialanýyna bailanysty meshitte jamaǵatpen oqityn namazdarǵa ýaqytsha shekteý qoiyldy. Ár azamattyń ómiri men densaýlyǵy qymbat qundylyq bolǵandyqtan, juqpaly indettiń aldyn alý úshin osyndai sheshim qabyldaýǵa májbúr boldyq. Bul – ýaqytsha synaq. Jamaǵat namazy úshin meshit esigi jabylǵanmen, saýap pen izgilik esikteri eshqashan jabylmaidy. Hadiste aitylǵandai, musylmannyń nieti amalynan qaiyrly. Onlain rejimde nasihat tyńdap, úiden shyqpai saýapty amaldarǵa ortaqtasýǵa bolady», - deidi QMDB Tóraǵasy, Bas múfti Naýryzbai qajy Taǵanuly.
Ol Qazaqstan musylmandary dini basqarmasy Ramazan aiynda jamaǵattyń igiligi úshin qandai jobalardy iske asyratyny týraly aitty.
«QMDB www.muftyat.kz saityna Ramazan entsiklopediiasy qosymsha paraqshasy qosylyp otyr. Bul paraqshadan Ramazan aiy týraly tolyq aqparat alýǵa bolady. Elimizdegi oblys ortalyqtary, aýdan, qala, kentterdiń Oraza kestesi qazaq jáne orys tilinde www.muftyat.kz saitynda ornalastyryldy. Hikmet.tv stýdiiasy arqyly 30 kún oraza boiy bilikti imam, ustazdarymyz «30 kúnde 30 ýaǵyz» atty onlain dáris júrgiziledi. Hikmet.tv stýdiiasy arqyly kún saiyn respýblikalyq Haziret sultan meshitiniń qabyrǵasynda bir saǵat onlain qatym oqylyp, qasietti Qadir túninde quran qatym duǵasy jasalady. Sondai-aq Mýslim.kz instagram paraqshasy arqyly imamdarmen bir tolqynda duǵa jasaýǵa niettengen jamaǵattyń igiligi úshin Ramazan aiynyń birinshi kúninen bastap kúndelikti ár 15 minýt saiyn Haziret Sultan meshitiniń qabyrǵasynda «Batamenen el kógerer» atty onlain rejimde duǵa jasap, bataǵa qatysý rásimi uiymdastyrylady», - deidi ol.
