Mamandar qazaqstandyqtardy tabys deklaratsiiasyn tezirek ótkizýge shaqyryp jatyr. Óitkeni el azamattary qazirden qimyldamasa, qujatty ótkizýde belgili bir qiyndyqtarǵa tap bolýy múmkin. Bul týraly búgin Almatyda ótken baspasóz máslihatynda Respýblikalyq kásipkerlerge kómek ortalyǵynyń direktory Dmitrii Kazantsev málim etti, dep habarlaidy Sputnik Qazaqstan tilshisi.
2020 jyldyń 1 qańtarynan bastap Qazaqstannyń 13 millionǵa jýyq turǵyny tabys pen múlik boiynsha jyl saiyn deklaratsiia ótkizetin bolady. Bul esepti el azamattary qaǵaz túrinde 2020 jyldyń 15 shildesine deiin, al elektrondy túrde 15 qyrkúiekke deiin ótkizý kerek.
"Oilańyzshy, 13 million (!) adam deklaratsiia ótkizedi. Bul - óte kóp kólem. Maman retinde bul deklaratsiiany qaǵaz túrinde ótkizbeýge keńes berer edim. Óitkeni ol qaýipsiz. Al kúzde sońǵy sátte 13 million adam elektrondy bazaǵa lap qoisa, ne bolady? Árine, baza kibirtikteidi. Saldarynan qanshama adam óziniń tabys deklaratsiiasyn der ýaqytynda ótkizip úlgermei qalady. Sondyqtan biz halyqty bul jait týraly aldyn ala eskertip, habarlap jatyrmyz", - dedi Kazantsev.
Al deklaratsiia der ýaqytynda ótkizilmei qalsa, Kazantsevtiń aitýynsha, adam ákimshilik jaýapkershilikke tartylýy múmkin.
"Úlgermese nemese toltyrǵan qujatta shynaiy aqparat kórsetilmese, onda ol adamǵa 30 ailyq eseptik kórsetkish kóleminde nemese 75 750 teńge aiyppul salynady", - dedi ol.
Qazaqtyń toiy da deklaratsiialaýǵa jatatyn bop shyqty. Árine, toidan túsken aqsha men syilyqtyń quny 500 myń teńgeden asqan jaǵdaida.
"Deklaratsiiada quny 500 myń teńgeden asatyn, bolashaqta satýǵa bolatyn nárselerdi kórsetýge keńes beremin. Bul baǵaly buiymdar, tondar, kartinalar bolýy múmkin. Al, máselen toidan túsken aqshalai syilyqty deklaratsiiadaǵy "taǵy basqa" degen grafaǵa toltyrýǵa bolady. Óte baǵaly syilyq alsańyz, onda syilaýshydan múmkindik bolsa, chegin surap alýǵa keńes berer edim", - deidi Kazantsev.
Oǵan qosa, endi qazaqstandyqtar bank kartasy arqyly jón-josyqsyz aqsha aýdarymyn jasai almaidy.
"Mysaly, dosyńyz "kartany bershi, aqsha aýdartyp ala qoiaiyn" deidi. Eger ol úlken soma bolsa jaǵdai qiyn. Óitkeni salyqshyǵa siz onyń qandai aqsha ekenin dáleldei almaisyz. Bireý kartańyzdy paidalanyp, 1 million teńge jóneltti delik. Sol 1 million teńgeniń salyǵy sizden alynatyn bolady, sebebi ol deklaratsiialanbaǵan", - deidi ol.
