Jalpy bilim beretin pánder boiynsha respýblikalyq olimpiadaǵa elimizdiń barlyq óńirinen 2 070 oqýshy qatysady. Qorytyndy kezeń 18 sáýirde bastalyp, 23 sáýirge deiin jalǵasady, dep habarlaidy "Ult aqparat" BǴM baspasóz qyzmetine silteme jasap.
1 107 oqýshy jaratylystaný-matematikalyq baǵyttaǵy pánder, al 963 oqýshy qoǵamdyq-gýmanitarlyq baǵyttaǵy pánder boiynsha synǵa túsedi.
«Qorytyndy kezeń olimpiadanyń barlyq aldyńǵy kezeńderi siiaqty Oqylyq.kz platformasynda elektrondy formatta ótedi. Ózderińiz baiqap otyrǵandai, Bilim jáne ǵylym ministri UBT, olimpiada jáne basqa da synaqtardy ótkizýdiń ashyqtyǵyna úlken mán beredi. Byltyr biz alǵash ret respýblikalyq kezeńdi elektrondy formatqa kóshirdik. Biraq oblystyq kezeńde ziiatkerlik jarystar qaǵaz túrinde ótkizilgendikten, onyń qorytyndysyna ata-analar tarapynan shaǵymdar tústi. Endi oqýshylar arasyndaǵy respýblikalyq olimpiadanyń barlyq kezeńin ótkizý protsesiniń ashyqtyǵyn qamtamasyz etý maqsatynda saiystar elektrondy formatta ótkiziledi. Bul tapsyrmalardyń jariialanyp ketý jáne belgili bir qatysýshylardyń múddesin qoldaý qaýpin azaitady. Byltyr halyqaralyq olimpiadalarda rekordtyq medalǵa qol jetkizdik. Árine, bul ádil irikteýdiń arqasy. Endi osy jetistikterdi odan saiyn kóbeitý úshin aýqymdy jumys atqaramyz. Tórtinshi kezeńniń jeńimpazdary olimpiadalyq rezervke ótedi jáne olar úshin oqý-jattyǵý jiyndary uiymdastyrylatynyn eskertemin. Nátijesinde IMO siiaqty aýqymdy halyqaralyq olimpiadalarda Qazaqstannyń namysyn qorǵaityn Ulttyq qurama jasaqtalady», - dedi QR BǴM «Daryn» respýblikalyq ǵylymi-praktikalyq ortalyǵynyń direktory Timýr Nurkeshov.
Olimpiadany ashyq, ádil ótkizý úshin protsess onlain-rejimde beinebaqylaý júiesimen qamtamasyz etiledi. Sonymen qatar jarysty múddeli emes tulǵalar, onyń ishinde «Adaldyq alańy» jobalyq keńsesiniń qyzmetkerleri, ata-analar komitetiniń ókilderi, jýrnalister, ǵalymdar men JOO oqytýshylary baqylaidy.
Esterińizge sala keteiik, olimpiadanyń mektep kezeńine 16 pán boiynsha 266 805 oqýshy, aýdandyq kezeńde 96 443, oblystyq kezeńde 14 369 oqýshy qatysty.
Olimpiada jeńimpazdary men júldegerleri týraly tolyq aqparat https://daryn.kz saitynda ornalastyrylady.
