Aqtóbe politsiiasy «mektepterde bomba bar» degen habarlamadan soń tekserý júrgizip, onyń jalǵan ekendigin aitty, dep habarlaidy QazAqparat.
«2-qyrkúiek kúni saǵat 07:20 shamasynda Aqtóbe qalasyndaǵy №1, 2, 21, 22 jáne 56 orta mektepteriniń elektrondy poshtasyna «ǵimaratqa bomba qoiylǵany» týraly habarlama kelip tústi. Barlyq shuǵyl qyzmetter men saperlar toby dereý oqiǵa ornyna shyqty. Ǵimarattardy tekserdi. Oqý oryndarynda oqýshylar bolǵan joq. Jarylǵysh qurylǵylar tabylǵan joq. Politsiia departamenti anonimdi habarlamalardyń avtoryn anyqtaýǵa jáne ustaýǵa baǵyttalǵan jedel is-sharalar júrgizip jatyr. Atalǵan derek boiynsha Qylmystyq kodekstiń «Terrorizm aktisi týraly kórineý jalǵan habarlaý» baby boiynsha sotqa deiingi tergeý bastaldy. Osy baptyń sanktsiiasy bes jylǵa deiingi merzimge bas bostandyǵynan aiyrý túrindegi jazany kózdeidi», - dep habarlady oblystyq PD baspasóz qyzmetiniń jetekshisi Erbolat Sarqulov.
Oblystyq bilim basqarmasynyń basshysy Joldas Batyrhannyń aitýynsha, mektep poshtasyna túsken habarlama - keshegi habarlamanyń dál kóshirmesi. Onda 6 mektepke jarylǵysh zat qoiylǵany týraly jazylǵan. Mektep ákimshiligi dereý politsiiaǵa habarlap, bir saǵat boiy tekserý júrgizildi. Keiin sabaq kestege sáikes jalǵasty.
