Foto: QR ǴJBM
Qazaqstanda internette jalǵan diplomdar týraly aqparattyń kóbeiýine bailanysty joǵary oqý oryndary túlekteriniń qujattaryn tekserý tetigi kúsheitildi. QR Ǵylym jáne joǵary bilim ministrligi 1991 jyldan beri berilgen diplomdardy qamtityn biryńǵai derekter bazasyn qurdy, dep habarlaidy Ult.kz.
Ministrliktiń málimetinshe, diplomdardyń mazmunyna qoiylatyn talaptar men olardyń resmi seriialary belgilendi. Endi árbir diplom arnaiy modýl arqyly biregei nómir jáne QR-kod berý jolymen generatsiialanady. Bul júiege qol jetkizý quqyǵy tek resmi tirkelgen ýniversitet qyzmetkerlerine ǵana beriledi.
Diplom nómirin qalyptastyrý «Joǵary bilim berýdiń biryńǵai platformasy» (JBBP) derekterine negizdeledi. Eger stýdent týraly aqparat JBBP bazasynda joq bolsa, diplomdy zańdy túrde rásimdeý múmkin emes. Demek, biregei nómiri men QR-kody joq diplomdar jaramsyz dep tanylady.
Sonymen qatar, QR Mádeniet jáne aqparat ministrligi men Ishki ister ministrligi jalǵan diplomdardy daiyndaý jáne satý derekterin turaqty túrde baqylaýda ustaidy. Qylmystyq kodekstiń 385-babyna sáikes jalǵan qujat jasaý nemese qoldaný aiyppul salýǵa, túzeý jumystaryna nemese eki jylǵa deiin bas bostandyǵynan shekteýge ne aiyrýǵa ákep soǵady.
Búgingi kúni 46 jalǵan diplom men olardy zańsyz daiyndaǵan 20 internet-resýrs anyqtalyp, materialdar IIM men MAM-ǵa joldanǵan.
Joǵary oqý oryndary derekterdi tsifrlandyrý jumystaryn jalǵastyrady. Al jumys berýshiler diplomnyń túpnusqalyǵyn epvo.kz servisi arqyly teksere alady. Diplomnyń elektrondyq nusqasy sondai-aq «Tsifrlyq qujattar» mobildi qosymshasynda qoljetimdi.
Ulttyq vedomstvo azamattardy jalǵan diplom jasaýdyń nemese qoldanýdyń zańmen qatań jazalanatynyn eskertedi.
