Aǵymdaǵy jyldyń basynan beri jalǵan aqparat taratýdyń 46 faktisi tirkeldi. Mundai quqyq buzýshylyq jasaǵandar aýyrlyǵyna bailanysty 5 jylǵa deiin bas bostandyǵynan aiyrylýy múmkin. Bul týraly búgin brifing barysynda QR IIM resmi ókili Almas Sadýbaev aitty, dep habarlaidy QazAqparat tilshisi.
«Aǵymdaǵy jyldyń basynan beri ishki ister organdary qasaqana jalǵan aqparat taratýdyń 46 faktisin tirkedi. Mundai quqyq buzýshylyq úshin onyń aýyrlyǵyna bailanysty aiyppul salýdan bastap 5 jylǵa bas bostandyǵynan aiyrýǵa deiin jaza kózdelgen», - dedi resmi ókil.
Osy rette Almas Sadýbaev áleýmettik jelide tarap, halyqtyń arasynda úlken alańdaýshylyq týyndatqan birqatar habarlamaǵa toqtaldy. Atap aitqanda, búirekteri kesip alynǵan eki balanyń múrdesi tabylǵandyǵy týraly aqparatty taratqan adamdar onyń sýretin de qosa jibergen jáne Qazaqstanda aǵzalaryn satý úshin balalar urlanady dep halyqty sendirýge tyrysqan. Alaida, dál mundai aqparat 2013 jyly ózbekstandyq BAQ-ta taralǵan bolatyn.
«Bilim berý qyzmetkerleriniń atynan mektepterde belgisiz adamdardyń kádimgi konfet túrindegi «Búldirgen» dep atalatyn esirtki zattaryn taratqandyǵy týraly aqparat ta qoǵamda úlken dúrbeleń týǵyzdy. Bul aqparat ta ótirik jáne ol ótken jyldary álemniń kóptegen elderinde túrli tilde taraǵan bolatyn. Osyǵan bailanysty mundai ósekterge ermeýge, tekserilmegen nemese kúdik týdyratyn aqparattardy taratpaýǵa shaqyramyz. Óitkeni, bul qylmystyq jazalanýǵa alyp keledi», - dedi resmi ókil.
