Áleýmettik messendjerler arqyly jalǵan aqparat taratqan Jezqazǵan qalasynyń turǵyny jeti jylǵa deiin bas bostandyǵynan aiyrylýy múmkin, dep habarlaidy "Ult aqparat".
27 naýryzda «WhatsApp» messendjerine monitoring júrgizý kezinde politsiia qyzmetkerleri Jezqazǵan qalasynda úsh adam koronavirýsty juqtyrǵany týraly aýdiojazba taratqan áiel adam anyqtaldy.
«Bul derek shyndyqqa sáikes kelmeidi, QK 274-babynyń 2-bóligi boiynsha sotqa deiingi tergeý bastaldy (telekommýnikatsiia jelilerin paidalaný arqyly kórineý jalǵan aqparat taratý). Júrgizilgen is-sharalar nátijesinde 32 jastaǵy qala turǵyny anyqtaldy», - dedi PD baspasóz qyzmeti.
Qaraǵandy oblysynyń politsiia departamenti azamattardy áleýmettik jelilerde paida bolǵan qaýesetter men jalǵan oi-pikirlerge qulaq aspaýǵa shaqyrady. Memlekettik organdardyń resmi málimetterine ǵana negizdelý qajet. Sondai-aq, tártip saqshylary osyndai qylmystardy jasaǵany úshin 7 jylǵa deiin bas bostandyǵynan aiyrý jazasy kózdelgenin eske salady.
