Jańaózendegi «Ózenmunaigaz» AQ jumysshylarynyń eńbekaqysyn arttyrý týraly sheshim qabyldandy. Bul týraly «QazMunaiGaz» ulttyq kompaniiasy AQ basqarma tóraǵasy Alik Aidarbaev málim etti, dep habarlaidy QazAqparat.
«Biyl 14 aqpanda Jańaózendegi «Ózenmunaigaz» AQ-nyń burǵylaý basqarmasynyń bir top qyzmetkeri jumysyn toqtatty. Olardyń talaby - jalaqyny keminde 41 paiyzǵa ósirý. Men jaǵdaidy estigen soń, birden Jańaózenge bardym. Sol kúni «Ózenmunaigaz» basshylyǵy jáne kásipodaq mamandarymen kelissóz júrgizildi. Shuǵyl jiynda jumysshylardyń talaptary men ony oryndaýdyń yqtimal joldaryn talqyladyq. Sondai-aq, basshylyqtan bólek, jumysshylarmen kezdesip, olardyń ótinish, usynystaryn tyńdadym», - dedi Alik Aidarbaev Mańǵystaý oblystyq qoǵamdyq kommýnikatsiia ortalyǵynda onlain ótken baspasóz máslihatynda.
Ulttyq kompaniia basshysynyń aitýynsha, «Ózenmunaigaz» AQ jumysshylarynan bólek, oǵan qarasty merdiger kompaniialardyń da qyzmetkerleri jalaqyny kóterýin talap etip, jumysyn toqtatqan.
«Munaishylarmen kelissózder kúni boiy júrdi. Onyń nátijesinde jaǵdaidy turaqtandyrý jáne kásiporynnyń jumysyn toqtatpaý týraly kelisimge kelip, jumysshylardyń jalaqysy kóteriletin boldy. Buǵan deiin 2020 jyldyń jeltoqsan aiynda jalaqy 10 paiyzǵa artsa, endi jańa kelisim boiynsha taǵy 20 paiyzǵa arttyrý týraly kelisim jasaldy. Osylaisha biyl jyl basynan jumysshylardyń jalaqysy 30 paiyzǵa ósetin bolady», - deidi ol.
Sondai-aq, basqarma tóraǵasy ósirilgen jalaqy kólemimen jumysshylardyń deni keliskenin aitty.
«Degenmen keibir jumysshylar jalaqyny 40-50 paiyzǵa kóterýdi talap etip otyr. Bizge 20 paiyzǵa arttyrý sheshimi ońaiǵa soqqan joq. Biyl odan artyq jalaqy kóterilmeidi, bul - sońǵy sheshim. Sondyqtan jalaqyny ósirýdi talap etýshi jandardan túsinistikpen qaraýyn suraimyn», - deidi Aidarbaev.
