Ár sózin ázilmen astarlap, uiqasyn keltirip aitatyn qazaqtyń búgingi urpaǵy «Ailyq, bola almaidy saǵan bailyq» degen maqal shyǵaryp alǵan. Munymen ne aitqysy keldi eken? Kim biledi, ai sońynda bir baiytyp baryp, óz ornyn taýyp ketetin jalaqyǵa jaldanǵannan góri kúndelikti kiris keltiretin kásipkerlikpen, saýda-sattyqpen ainalys degendi tuspaldaǵany shyǵar...
Degenmen, áleýmettiń áleýetin arttyrý jolynda ailyq jalaqynyń joǵary bolýy mańyzdy ról atqarady. Elbasy N.Nazarbaev sońǵy Joldaýynda jumysshylar jalaqysyn kóterýdi tapsyrǵan edi. Elbasynyń Joldaýyna alǵashqylardyń biri bolyp Saryaǵash aýdanyndaǵy «Gúljan» balabaqshasy men «Balsheker» balabaqshasy qoldaý kórsetti. Atap aitqanda, «Gúljan» balabaqshasy 31 qyzmetkerdiń, al, «Balsheker» balabaqshasy 19 qyzmetkerdiń ailyq jalaqysyn 2018 jyldyń qarasha aiynan bastap 35 paiyzǵa, 2019 jyldan bastap 15 paiyzǵa kóbeitetin boldy.
Joldaýǵa qoldaý bildirip, jumysshylarynyń jalaqysyn kótergender qatary munymen shektelmeidi. Onyń ishinde iri mekemeler men kásiporyndar da bar. 224 adamdy turaqty jumyspen qamtyp otyrǵan «Mankent shipajaiy» AQ 2019 jyldyń 1 qańtarynan bastap ailyq jalaqyny 10 paiyzǵa kóbeitip, ortasha ailyqty 116 900 teńgege teńestirmek bolsa, eki júzge jýyq jumysshysy bar «VIZiT» alkogolsiz sýsyn shyǵaratyn zaýyt ta jalaqyny 10 paiyzǵa kóterip, eń tómengi jalaqynyń ózin 44000 teńgege jetkizbek. Al, «Altyn dán» JShS-i – 25 paiyz, «Himfarm» AQ 8 paiyz qosyp, ortasha ailyqty 190 000 teńgege jetkizdi.
Atalǵan baǵyttaǵy jumystar áli de jalǵasyn taýyp jatyr. Demek, jumysshylarynyń jalaqysyn kóteretinder sany aldaǵy ýaqytta budan da kóbeietin bolady.
Ońtústikshelep termeletsek, «ádemi ǵoi»!
"Ońtústik Qazaqstan"
