QR Aqparat jáne qoǵamdyq damý ministri Dáýren Abaev jala jabýǵa qatysty pikir bildirdi, dep habarlaidy QazAqparat.
«Elbasynyń «Nur Otan» partiiasy Saiasi keńesiniń otyrysyndaaitqan jala jabýǵa jazany kúsheitý týraly tapsyrmasy keńinen talqylanýda. Ásirese, azamattardyń abyroi-bedeline nuqsan keltiretin jalǵan aqparat taratatyn kóptegen anonimdik derekkózder, jalǵan akkaýnttar men paraqshalar Elbasynyń alańdaýshylyǵyn týdyryp otyr. Búginde bul - jalpyálemdik úrdis jáne demokratiiasy damyǵan memleketterdiń ózi jala jabý týraly normany kúsheitip jatyr. Germaniiada jalǵan habar taratqan basylymdy 50 mln eýroǵa aiyppul salý, BAQ qoldaný arqyly jala japqany úshin 5 jylǵa bas bostandyǵynan shekteý syndy túzetýler qabylandy. Tipti áleýmettik jelilerdiń ákimshilikteri feik aqparatpen kúres mehanizmin engizip jatyr», - dedi Dáýren Abaev Úkimet úiinde ótken baspasóz máslihatynda.
Onyń aitýynsha, QR Qylmystyq kodeksinde qasaqana jala jabýǵa qatysty eki bap bar.
«Qylmystyq kodekstete Jala jabý týraly 130-bap jáne qasaqana jalǵan aqparat taratý týraly 274-bap bar. Óz sózinde Elbasy BAQ pen telekommýnikatsiia jelileri qatysqan jala jabýdy aityp otyr. QR QK 130-babynda 2 myń AEK aiyppul nemese eki jylǵa deiingi bas bostandyǵynan aiyrý jazasy kózdelgen. Al adamdy sybailas jemqorlyq, aýyr qylmys jasady dep aiyptasa, 3 myń AEK aiyppul nemese 3 jylǵa jyl bas bostandyǵynan aiyrýy múmkin. 274-bap boiynsha, eń aýyr jaza - tótenshe jaǵdai kezinde nemese soǵys jaǵdaiynda jalǵan aqparat taratý úshin jeti jylǵa deiingi bas bostandyǵynan aiyrý», - dep túsindirdi ministr.
Spiker jala jabýǵa qatysty zańnamalardyń qoldaný aiasy tómen ekenin jasyrmady.
«Zańǵa sáikes, búkil quraldar bolsa da, ony qoldaný aiasy tómen. Sondyqtan, jumysymyzdy osy arnaǵa buramyz. Qazaqstanda 100-den astam adam eki bappen óz quqyqtaryn qorǵady. (...) Tapsyrma eki kún buryn berildi. Bizdiń mamandar bul máseleni muqiiat zerttep jatyr. Mindetti túrde Bas prokýratýramen, Joǵarǵy sotpen, quqyq qorǵaý organdarymen jáne Nur Otan fraktsiiasymen birlese jumys júrgiziledi. Halyqaralyq tájiribege nazar aýdarylady. Jalpy alǵanda, eki bap álemdik tájiribege sáikes keledi. Sondyqtan, bar nazardy qoldanbaly tájiribege aýdaryp, ony jetildire túsemiz. Barlyq usynystardy jariialaimyz jáne jumys toptarymen, vedomtsvoaralyq kommisiiamen, quqyq qorǵaý organdarymen birge talqylaimyz. Jala jabýmen kúreste Qazaqstan azamattary shet qalmaýy tiis. Ókinishke qarai, bul másele árqaisysymyzdyń basymyzdan ótýi múmkin», - dedi D. Abaev.
