2019 jyldyń 10 maýsymynda ótken QR Prezidentiniń sailaýy kezinde sotqa prezidenttikke úmitkerler men olardyń ókilderinnen 67 talap-aryz tústi. Bul týraly búgin sýdialardyń keńeitilgen keńesinde QR Joǵarǵy sotynyń tóraǵasy Jaqyp Asanov aitty, dep habarlaidy "Ult aqparat".
«Rasynda da quqyq buzýshylyq oryn aldy. Ony ózderińizde BAQ-tan bilesizder. Al kóbinese bireý basqa bireýdiń atynan biýlleten alyp, daýys berý quqyǵyn buzýshylyq kóp boldy. Meniń bilýimshe, prokýratýra organdary 26 ákimshilik is qozǵap, olardy sotqa engizdi. Olar boiynsha biz barlyq kináli tulǵalardy tiisti jaýapkershilikke tarttyq. Ol - kóbine aiyppuldar. Jazalanǵandardyń basym kópshiligi - sailaý komissiialarynyń músheleri, ishinde tipti tóraǵalary da bar», - dedi Jaqyp Asanov BAQ ókilderiniń saýalyna orai.
Onyń aitýynsha, sailaý kezinde tek baiqaýshylar ǵana emes, sonymen birge prezidenttikke úmitkerler, olardyń ókilderi talap-aryzdaryn bergen.
«Jalpy olardyń sany - 67-i. Osy talap-aryzdardyń basym kópshiligin sýdialar keri qaitarýǵa májbúr boldy. Óitkeni bizdiń azamattyq is júrgizý kodeksimizdiń talaptary bar. Soǵan sáikes jazylǵan talap-aryzdyń formasy, mazmuny zańǵa sáikes bolýy kerek. Kóp jaǵdaida talap-aryzdyń avtorlary ony saqtamaǵan. Mysaly jaýapkerdi kórsetpegen nemese men baqylaýshymyn, prezidenttikke úmitkerdiń ókilimin dep jazǵanymen mártebesin dáleldeitin qujattardy tirkemegen. Ne bolmasa sol talap-aryzda ózderiniń naqty bir ótinishin, talabyn jazbaǵan. Ondai jaǵdaida biz árine aryzdy keri qaitarýymyz kerek. Sýdialardyń ondai talap-aryzdardy qaraýǵa quqy joq. Jalpy, árbir is boiynsha sheshim qabyldandy. Al ol sheshim zańdy ma, zańsyz ba? Shynymdy aitsam, meniń oǵan baǵa berýge quqym joq», - dedi Joǵarǵy sot tóraǵasy.
