Qytaida sottalǵan 14 qazaqstandyq elge oralyp, jazasyn óteýde. Bul jaiynda QR Bas prokýratýrasynan málim etti, dep habarlaidy QazAqparat.
Aita keteiik, QR Bas prokýrory Jaqyp Asanov 30-31 naýryz kúnderi QHR-ǵa saparmen baryp, sol eldiń Ádilet ministri Chjan Tsziýnmen zań salasyndaǵy memlekettik qyzmetterdi usynýdyń ashyqtyǵy jáne qylmystyq-atqarý júiesin jetildirý máselelerin talqylady. Kezdesýde Jaqyp Asanov QHR-da sottalyp, aiybyn ótep jatqan 9 qazaqstandyq azamat týraly sóz qozǵady. Olardyń Qazaqstanǵa aýysqysy keletinin, biraq QHR-da olarǵa salynǵan aiyppuldy tóleýge múmkindikteri joq ekendigin aitty.
Jalpy, QR Bas prokýratýrasynyń málimetterinshe. aǵymdaǵy jyldyń 14 naýryzynda Qytaidan úsh otandasymyz elge jazasyn odan ary óteý úshin jetkizilgen.
«2017 jyldyń 22 aqpanynda Qytaidyń ádilet ministrligi QR Bas prokýratýrasynyń atalǵan máselege qatysty qoldaý hatyn qanaǵattandyrǵan bolatyn. Azamat K. men R. quny 3,5 mln. dollardan asatyn Amýr kiiginiń 719 dana múiizin kontrabandalaǵany úshin qytai soty taǵaiyndaǵan jazalaryn ótegen. Úshinshi azamat ta Qytaiǵa jalpy quny 115 myń AQSh dollaryn quraityn aiý terisin, 35 dana aiý tabanyn jáne 13,71 keli korditsepsti (dástúrli qytai meditsinasynda qoldanylatyn sirek kezdesetin sańyraýqulaq túri) kontrabandalyq jolmen tasymaldaǵan», - delingen aqparatta.
Sonymen qatar vedomstvo aqparatynda qytai sottarynyń úkimi Qazaqstan aýmaǵynda da moiyndalatyndyǵy jáne ulttyq zańnamamyzǵa sáikes júzege asyrylatyndyǵy atap ótilgen.
«Bizdiń azamattarymyzǵa jaza merzimin odan ary otanynda óteýge múmkindik berdi. Atap óterligi, qytailyq áriptestermen is-qimyldyń jolǵa qoiylýynyń arqasynda QHR-men sottalǵandardy ózara berý týraly shart kúshine (30.09.2015) engen sátten beri 14 qazaqstandyq elge qaitaryldy. Búgingi kúni qytai túrmelerinde taǵy 9 qazaqstandyq jazasyn óteýde. Atalǵan tulǵalardyń 10-nan 100 myń iýanǵa deiin tólenbegen aiyppuldary bar. osyǵan bailanysty olardy Qazaqstanǵa aýystyrýdan bas tartylǵan. Qazirgi ýaqytta olardyń tek úsheýi ǵana aiyppuldaryn tólep, bas tartý sheshimi qaita qaralýda. Bul baǵyttaǵy jumystar jalǵasady», - dedi Bas prokýratýra baspasóz qyzmetinen.
