QR Densaýlyq saqtaý ministrligi Meditsinalyq kómekti uiymdastyrý departamenti direktorynyń orynbasary Gúlnar Sársenbaeva Biryńǵai jinaqtaýshy zeinetaqy qorynan alynǵan qarajatty qandai emge jumsaýǵa bolatyndyǵyn aitty, dep habarlaidy QazAqparat.
«Ony alý úshin azamat BJZQ-nyń internet-resýrsy nemese «elektrondyq úkimet» veb-portaly arqyly birjolǵy zeinetaqy tóleminiń qoljetimdi somasyn anyqtaýy qajet. Eger qordaǵy soma jetkilikti bolsa, onda azamat tirkelgen jeri boiynsha meditsinalyq uiymǵa júginip, dárigerlik komissiianyń birjolǵy zeinetaqy tólemderi esebinen emdelýge jiberý týraly qorytyndysyn alýy qajet», - dedi ol Ortalyq kommýnikatsiialar qyzmetindegi baspasóz máslihaty barysynda.
Onyń túsindirýinshe, dárigerlik komissiia ótinish bergen kúnnen bastap 5 jumys kúninen keshiktirmei zeinetaqy tólemderi esebinen emdelýge jiberý týraly ne meditsinalyq kórsetkish bolmaǵan jaǵdaida bas tartý týraly sheshim qabyldaidy. Qorytyndy dárigerlik komissiianyń otyrysy ótkizilgen kúnnen bastap 2 jumys kúni ishinde beriledi.
Jinaqtalǵan zeinetaqy qarajaty esebinen azamattar orfandyq aýrýlardy emdeý, Qazaqstan Respýblikasynyń aýmaǵynda ornalasqan meditsinalyq uiymdarda kórsetiletin stomatologiialyq qyzmetter (tisti protezdeý, implantatsiia), operatsiiadan keiingi tyrtyqtar men týa bitken aqaýlardy túzetý maqsatynda rekonstrýktivti jáne qalpyna keltirý operatsiialary (plastikalyq), sondai-aq mastektomiia, radionýklidtik jáne radioiodterapiia, radiohirýrgiialyq emdeý (gamma-pyshaq, kiber pyshaq), protondy terapiia, oftalmologiialyq qyzmetter siiaqty qymbat turatyn qyzmetterdi ala alady. Sonymen qatar, atalǵan tizbe halyqtyń qajettiligin eskere otyryp, ózgerýi múmkin.
Meditsinalyq komissiianyń oń qorytyndysy bolǵan jaǵdaida ótinish berýshi meditsinalyq uiymdy tańdap, shart jasasýy qajet. Sodan keiin, ETsQ kómegimen ýákiletti operatordyń internet-resýrsynda óziniń jeke kabinetin ashý, onda somasyn, paidalaný maqsatyn kórsete otyryp, birjolǵy zeinetaqy tólemine elektrondyq ótinishti toltyrý, dárigerlik komissiia qorytyndysynyń skanerlengen kóshirmelerin, meditsinalyq uiymmen emdeý týraly shartty bekitý jáne óziniń ETsQ-men kýálandyrý qajet. Ótinish berýshiniń ETsQ-sy qoiylǵan, ýákiletti operatorda tirkelgen Tólemge arnalǵan ótinish týraly málimetter BJZQ-ǵa elektrondyq habarlama sheńberinde kelip túsedi. BJZQ ýákiletti operatordan elektrondyq habarlama alǵan kúnnen bastap 5 jumys kúni ishinde birjolǵy zeinetaqy tóleminiń somasyn ótinish berýshiniń ýákiletti operatorda ashylǵan arnaiy shotyna aýdarady.
Ýákiletti operator alýshy usynǵan birjolǵy zeinetaqy tólemderiniń nysanaly maqsaty boiynsha qujattardy tekseredi jáne olar sáikes kelgen jaǵdaida olardy alǵan kúnnen bastap 5 jumys kúni ishinde ótinish berýshi tańdaǵan meditsinalyq uiymnyń nysanaly maqsaty boiynsha qarajatty aýdarady.
«Sondai-aq, jubaiynyń (zaiybynyń), jaqyn týystarynyń birjolǵy zeinetaqy tólemderin emdeýge paidalanýǵa bolatynyn atap ótkim keledi. Mundai jaǵdailarda taraptar jeke kabinette týystyq qatynastardy rastaityn qujattardy qosa kórsetip, olardyń ETsQ-men kýálandyrylatyn birjolǵy zeinetaqy tólemderin berý týraly kelisim jasasady», - dedi G.Sársenbaeva.
