An-26 desantshylary Qurmanbek Bákievti Jalal-Abadtan Tarazǵa jetkizgen. Bul týraly QR Prezident Ákimshiliginiń jetekshisi Ádilbek Jaqsybekov "Habar" telearnasyndaǵy "Bitimgershilik missiiasy. Qyrǵyz daǵdarysy" derekti filminde aitady. Ol kezde Jaqsybekov qorǵanys ministri qyzmetinde bolatyn, - dep habarlaidy kaz.tengrinews.kz tilshisi.
Nursultan Nazarbaev Vashingtonnan Ádilbek Jaqsybekovke 04 arnaiy bortyn daiyndap qoiý týraly buiryq bergen. Vedomstvo basshysy túngi ýaqytta keńes ótkizip, al tańerteń Prezidenttiń ózi Astana áýejaiynda jiyn ótkizgen. Jiyn barysynda oǵan operatsiianyń mán-jaiy baiandaldy.
"Ondaǵy jaǵdai jaily eshteńe bilmedik, qarýly kúshteri jaily da málimet bolǵan joq. Olarǵa kim basshylyq etedi, qansha adam bar - biz bilmedik. Eshqandai málimet bolmady. Bákiev bizge óziniń Jalal-Abadta ekenin aitty jáne ol onda ózin qoldaityn adamdardyń bar ekeni, sondai-aq, óziniń bizdiń áskeri ushaqty Jalal-Abadta kútip alýǵa daiyn ekenin aitty", - dep eske aldy Jaqsybekov.
Jalal-Abadta qazaqstandyq bortty áskeriler kútip aldy. Bákiev onda otbasymen jáne jol sómkesimen keldi. Tarazǵa deiin shtattyq rejimde kóship bardy. Al Tarazda Bákievti sol kezde óńir ákimi bolǵan Qanat Bozymbaev kútip aldy.
"Ushaqpen ushyp keldi, esikteri ashyldy, biraq ushaqtan eshkim shyqqan joq. Sodan ushaqqa qarai jaqyndap, bortqa kóterildim. Ondaǵylarǵa aty-jónimdi aittym. Maǵan tapsyrma berilgenin jáne meniń Qyrǵyzstan prezidentin kútip alýym kerektigin aittym", - dep eske aldy Bozymbaev.
Sondai-aq, Bozymbaev Bákiev Qazaqstanǵa kele salysymen otstavkaǵa ketý týraly ótinishke qol qoiýy kerek bolatynyn bilgenin aitady.
"Keiinirek shamamen bir eki saǵattan keiin men Bákievten bylai dep suradym: "Baike, Qurmanbek Sáliuly, Siz qaǵazdarǵa qol qoiýyńyz kerek edi jáne men ol qaǵazdardy alyp, jiberýim kerek" dedim. Ol bastapqyda qandai qaǵazdar týraly aitylyp jatqanyn túsinbegendei syńai tanytty. Sosyn men oǵan túsindirdim. Sol kezde ol oǵan qaǵaz ben qalam alyp kelýin surap, barlyǵymyzdyń shyǵyp ketýimiz kerek ekenin aitty", - dedi Qanat Bozymbaev.
