Biyl besinshi ret ótetin «Astana klýbynyń» otyrysyna iadrolyq qarýdy taratpaý máselesi, AQSh pen Qytai arasyndaǵy saýda-sattyq soǵysy, álemdik ekonomikanyń damý úrdisiniń tómendeýi, jahandyq klimattyń ózgerýi siiaqty aýqymy keń taqyryptar qamtylady. Bul týraly Ortalyq kommýnikatsiialar qyzmetinde ótken brifingte Ekonomika jáne saiasat institýtynyń sarapshysy Erlan Mádiev aitty, dep habarlaidy QazAqparat.
«Biyl «Astana klýbynyń» otyrysynda iadrolyq qarýdy taratpaý máselesi, AQSh pen Qytai arasyndaǵy saýda-sattyq soǵysy, álemdik ekonomikanyń damý úrdisiniń túsýi, jahandyq klimattyń ózgerýi siiaqty aýqymy keń taqyryptar qamtylady. Osy máseleler boiynsha progreske jetý – qiyn. Mańyzdysy – osy máseleler boiynsha álemdik áriptestikti saqtaý jáne oǵan jańa serpin berý. Qazirgi ýaqytta jahandyq problemany eshbir memleket jalǵyz ózi sheshe almaidy, ony búkil álemdik qaýymdastyq birigip sheshýi kerek. Osyny júzege asyrý úshin bizge eń aldymen suhbat kerek. Bul otyrystyń túpki maqsatyn, mańyzyn túsiný – óte mańyzdy», -dep atap ótti ekonomika jáne saiasat institýtynyń sarapshysy Erlan Mádiev.
QR Tuńǵysh Prezidenti - Elbasy Qorynyń Halyqaralyq baǵdarlamalary ortalyǵynyń basshysy Qairat Abýseitov «Astana klýby» otyrysynda kóterilgen máselelerdiń sheshý joldary qanshalyqty júzege asatyny týraly aitty.
«Bul sharada pikir-talas, talqylaý – óte mańyzdy. Otyrysta «Astana klýby» qandai da bir usynymdar aitpaidy», - deidi ol.
Besjyldyq qyzmet barysynda Astana klýby dúniejúziniń 40 eliniń 200-den astam sarapshylarynyń bas qosqan bedeldi halyqaralyq pikirtalas alańyna ainaldy.
Atalǵan sharany QR Tuńǵysh Prezidenti - Elbasy Qory men Qor janyndaǵy Álemdik ekonomika jáne saiasat institýty uiymdastyrady. «Astana Klýbynyń» missiiasy – Qazaqstannyń syrtqy saiasattaǵy basymdyqtary turǵysynan jahandyq kún tártibin qalyptastyrý úshin Eýraziianyń jetekshi sarapshylary, saiasi kóshbasshylary men diplomattarynyń basyn biriktirý.
