Jahandyq infliatsiia buǵan deiin boljanǵan ýaqyttan da uzaq bolady. Bul týraly búgin Úkimet otyrysynda QR Ulttyq banki tóraǵasy Ǵalymjan Pirmatov aitty, dep habarlaidy QazAqparat.
«Geosaiasi táýekelderdiń iske asyrylýy, jahandyq taýar jetkizý joldary problemalarynyń shielenisýi, azyq-túlik pen energiia resýrstary baǵasynyń ósýine bailanysty álemdegi syrtqy infliatsiialyq qysymnyń kúsheiýi, baǵamnyń álsireýi infliatsiianyń barynsha joǵary dinamikasynyń basty sebebine ainalady. Ulttyq bank el ekonomikasyna syrtqy shok saldarynyń taralýyn aldyn alý, teńgege qysymdy tómendetý jáne teńgedegi aktivterdi qorǵaý is-sharalaryn qabyldaýda. Osy maqsattar úshin biylǵy jylǵy 24 aqpanda Ulttyq bank bazalyq stavkany 13,5 paiyzǵa deiin kóterdi», - dedi Ǵalymjan Pirmatov.
Onyń atap ótýinshe, geosaiasi ahýal nasharlap, syrtqy táýekelderdiń júzege asýy jaǵdaiynda infliatsiia boljamy joǵarylaý jaǵyna qarai qaita qaralýda. Infliatsiianyń 2022-2023 jyldardaǵy nysanaly dálizden joǵary bolyp qalyptasý táýekeli de artyp otyr.
«Osy jylǵy aqpan aiynda jyldyq infliatsiia barlyq komponentteriniń qymbattaýy aiasynda 8,5-ten 8,7 paiyzǵa deiin jedeldedi. Infliatsiiaǵa azyq-túlik taýarlary úlken úles qosady. Olarǵa baǵanyń ósýi 10 paiyzǵa deiin nan-toqash ónimderiniń, jarmalardyń, sút ónimder men kókónisterdiń qymbattaýyna bailanysty jedeldedi», - dedi ol.
UB tóraǵasynyń aitýynsha, azyq-túlikke jatpaityn infliatsiia 8,5-ten 8,6 paiyzǵa deiin ósti. Aqyly qyzmetter 6,8-den 7,1 paiyzǵa deiin jedeldedi. Bul birqatar naryqtyq qyzmetter baǵasynyń ósýine bailanysty.
«Energiia, metall jáne aýylsharýashylyq ónimderi baǵasynyń ósýine bailanysty jahandyq infliatsiia buǵan deiin boljanǵan ýaqyttan da uzaq merzim bolady jáne ishki baǵalarǵa qysym jasaidy», - dedi Ulttyq bank basshysy.
