Senatta «Jahandaný dáýirinde ulttyq qundylyqtardy dáripteý – keshendi jańǵyrýdyń negizi» taqyrybyna arnalǵan parlamenttik tyńdaý ótti, dep habarlaidy "Ult aqparat".
Senat tóraǵasy Máýlen Áshimbaev ulttyq qundylyqtardy dáripteý máselesine Memleket basshysy basa mán berip otyrǵanyn jáne Prezident óziniń «Táýelsizdik bárinen qymbat» atty maqalasynda osy taqyrypqa toqtalǵanyn aitty.
«Jahandaný protsesine túrli úrdisterge ilesý ǵana emes, ózimizdiń ozyq qasietterimizdi jáne jetistikterimizdi álemge tanytý múmkindigi dep qaraýymyz kerek. Halqymyz ǵasyrlar boiy óziniń qaitalanbas mádenietin, ónerin, salt-dástúrin qalyptastyrdy. Biz olardy saqtap qana qoimai, álemdik mádeniettiń úzdik úlgilerine ainaldyrýymyz kerek. Elbasy bastamasymen qolǵa alynǵan «Rýhani jańǵyrý» baǵdarlamasy da osyndai ideialarǵa taban tireidi», – dedi M. Áshimbaev.
Senat tóraǵasy ulttyq qundylyqtardyń aiasy keń ekenin, qasterli táýelsizdik pen qasietti jerimiz solardyń eń bastysy sanalatynyn da tilge tiek etti. Tilimiz, mádenietimiz ben salt-dástúrimiz qaitalanbas erekshelikterimiz ekenin aitqan Máýlen Áshimbaev adami qundylyqtarǵa, hakim Abaidyń ósietine keńirek toqtaldy. Sonyń ishinde aqynnyń «Tolyq adam» tujyrymdamasyndaǵy nurly aqyl, jyly júrek jáne ystyq qairatqa taban tirei otyryp, qoǵamda durys qundylyqtar qalyptastyrýdyń mańyzy zor ekenin aitty.
«Tolyq adam» týraly Prezidentimiz «Abai jáne HHI ǵasyrdaǵy Qazaqstan» atty maqalasynda aitqany belgili. Shyn máninde, biz nurly aqyl aiasynda qoǵamda bilim kýltin qalyptastyrýymyz qajet. Sonyń ishinde ómir boiy bilim alý daǵdysyn negizgi qaǵidatqa ainaldyrǵanymyz jón. Sondai-aq, ózara senim, janashyrlyq pen jaýapkershilik siiaqty qundylyqtardy keńinen dáriptegen abzal. Onyń bári Abai aitqan jyly júrekten bastaý alady. Qoǵamda senim bolǵan jerde adami qarym-qatynastyń nyǵaiýymen qatar, ekonomika da damidy degen zańdylyq bar. Aqyn ósiet etken ystyq qairatqa talap pen eńbekqorlyq sekildi qasietter jatady. Munyń bári jańa zamanda ulttyq ustanymǵa, ómirlik maqsatqa ainalýy qajet», – dedi Senat tóraǵasy .
Palata Spikeri ulttyq qundylyqtardy durys dáripteý asa mańyzdy ekenine nazar aýdaryp, bul rette negizgi salmaq bilim berý salasyna túsetinin jetkizdi. Soǵan sáikes, bala adamdyq álippesin ata-anasymen qatar mektepten de úirenip, bilim mekemeleri janashyr, adal, jaýapty, eńbekqor bolýdy erte jastan balanyń boiyna sińirýge tiis ekenin atap ótti.
«Ol úshin oqý baǵdarlamasyna ulttyq qundylyqtardy dáripteý sabaqtaryn qosyp, ony jańasha jasaqtaý máselesin qaraǵan jón bolar edi. Sondai-aq, bul máselede intelligentsiianyń alatyn orny erekshe. Aldyńǵy aǵa býyn osy baǵyttaǵy missiiasyna adaldyq tanytyp, árdaiym ultymyzdyń úni, qorǵaýshysy bolyp keledi. Endigi kezekte, elimizde ziialy qaýymnyń jańa býynyn qalyptastyrýdy ózekti máselelerdiń biri dep esepteimiz. Olar HHI ǵasyrda ulttyq qundylyqtardy saqtaýshy jáne nasihattaýshy bolýy kerek», – dedi Máýlen Áshimbaev.
Sonymen qatar Senat depýtaty Baqytjan Jumaǵulov, memleket jáne qoǵam qairatkeri Ómirzaq Ozǵanbaev, Qazaqstan Jazýshylar odaǵynyń tóraǵasy Ulyqbek Esdáýlet, «Turan» ýniversitetiniń rektory Rahman Alshanov, «Egemen Qazaqstan» RG» AQ basqarma tóraǵasy Darhan Qydyráli, A.Baitursynov atyndaǵy Til bilimi institýtynyń direktory Anar Fazyljanova, Qazaqstan halqy Assambleiasy Tóraǵasynyń orynbasary Maiia Bekbaeva jáne taǵy basqa azamattar sóz sóilep, ulttyq qundylyqtardyń máni men mańyzyn keńirek baiandady.
