Túrkistan oblysynyń Ordabasy aýdanynda koronavirýs juqtyrǵan naýqastardyń bári jazylyp shyqty. Bul týraly QR Densaýlyq saqtaý ministrliginiń resmi ókili Baǵdat Qojahmetov aitty, dep habarlaidy QazAqparat.
«Memlekettik deńgeide qabyldanǵan sharalardyń naqty nátijesi týraly aitar bolsam, koronavirýs infektsiiasynyń taralýy kúnnen kúnge tómendep keledi. Sáikesinshe, meditsinalyq mekemelerdiń júktemesi azaiyp jatyr. Salystyrmaly túrde aitatyn bolsaq, 2020 jyldyń 15 shildesindegi jaǵdai boiynsha elimizde provizorlyq emdeý oryndary men statsionarlarda 17 798 tósek-oryn boldy. Ol kezdegi júkteme 57 paiyzdy quraǵan. Qazir aýrýhanalarda jatyn oryndardyń sany 37 myń, júkteme 29 paiyzǵa deiin azaidy. Qýanyshtysy, keibir óńirlerde naýqastar túgel jazylyp shyǵyp, aýrýhana bos turǵan jaǵdailar bar», - dedi ol Ortalyq kommýnikatsiialar qyzmetindegi brifing barysynda.
Máselen, resmi ókildiń aitýynsha, Túrkistan oblysynyń Ordabasy aýdanyndaǵy infektsiialyq bólim qazirgi ýaqytta bos tur. Iaǵni, Ordabasy aýdanynda koronavirýs indetimen aýyryp jatqan naýqas joq.
«Al jedel járdemge túsetin habarlamalar kólemi aimaqtarda aitarlyqtai azaiǵan. Ótken aptada Densaýlyq saqtaý vitse-ministri Ajar Ǵinaiat halyq eń kóp shoǵyrlanǵan Shymkentke jumys saparmen baryp keldi. Onda 5 aptanyń ishinde aýrýhanalardaǵy emdelýge arnalǵan jatyn oryndardyń júktemesi 60 paiyzǵa deiin tómendegen. Mundai jaǵymdy nátijeler elimizdiń barlyq óńirinde baiqalady. Biraq, jaǵdai jaqsardy eken dep saqtyq erejelerin buzýǵa bolmaidy», - dedi Baǵdat Qojahmetov.
